બાબરા શહેરમાં ગણેશ મહોત્સવને લઈને ભક્તિ અને ઉત્સાહનો માહોલ જોવા મળી રહ્યો છે. શહેરના કપીલા હનુમાનજી મહારાજના મંદિર પટાંગણમાં શ્રી કપીલા હનુમાન યુવા મંડળ દ્વારા ગણપતિ બાપ્પાની ભવ્ય સ્થાપના કરવામાં આવી હતી.આજે સાંજે 5:00 કલાકે શ્રી કપીલા હનુમાન યુવા મંડળના યુવાનો દ્વારા ગજાનન ગણપતિ મહારાજની મૂર્તિને વાજતે-ગાજતે અને ભક્તિમય વાતાવરણ વચ્ચે મંદિર પરિસરમાં લાવવામાં આવી હતી. ઢોલ-નગારાના તાલે તથા ગણપતિ બાપ્પાના જયઘોષ સાથે સમગ્ર વાતાવરણ ભક્તિમય બની ગયું હતું.ત્યારબાદ ધાર્મિક પરંપરા અને વિધિ-વિધાન મુજબ શ્રી ગણપતિ મહારાજની વિધિવત સ્થાપના કરવામાં આવી હતી. સ્થાપના પ્રસંગે મોટી સંખ્યામાં યુવાનો, મહિલાઓ, બાળકો તેમજ સ્થાનિક રહેવાસીઓ અને પાડોશીઓ ઉપસ્થિત રહ્યા હતા. સૌએ ઉત્સાહભેર ગણપતિ સ્થાપના કાર્યક્રમમાં ભાગ લઈ બાપ્પાના દર્શન અને પૂજનનો લાભ લીધો હતો.ગણપતિ બાપ્પાની સ્થાપના દરમિયાન “ગણપતિ બાપ્પા મોરયા”ના જયઘોષથી કપીલા હનુમાનજી મંદિર પરિસર ગુંજી ઉઠ્યું હતું. ભક્તોએ શ્રદ્ધાપૂર્વક બાપ્પાની આરતી કરી સુખ, શાંતિ અને સમૃદ્ધિ માટે પ્રાર્થના કરી હતી.
શ્રી કપીલા હનુમાન યુવા મંડળ દ્વારા ગણેશ મહોત્સવ દરમિયાન વિવિધ ધાર્મિક અને સામાજિક કાર્યક્રમોનું આયોજન કરવામાં આવનાર હોવાનું જણાવાયું છે. ગણપતિ મહોત્સવને લઈને યુવાનોમાં પણ ભારે ઉત્સાહ જોવા મળી રહ્યો છે.આ પ્રસંગે સ્થાનિક આગેવાનો, યુવા કાર્યકરો, મંદિર સાથે જોડાયેલા સેવાભાવી લોકો તેમજ આસપાસના રહેવાસીઓ ઉપસ્થિત રહી કાર્યક્રમને સફળ બનાવવામાં સહયોગ આપ્યો હતો.
કપીલા હનુમાનજી મંદિર ખાતે ગણપતિ બાપ્પાની સ્થાપનાથી બાબરા શહેરમાં ગણેશોત્સવની ભક્તિમય શરૂઆત થઈ છે.