આઈપીએલ ૨૦૨૬ (IPL 2026) ના ક્વોલિફાયર-૨ ના હાઈ-વોલ્ટેજ મુકાબલામાં ગુજરાત ટાઇટન્સે (GT) શાનદાર પ્રદર્શન કરતા રાજસ્થાન રોયલ્સને (RR) ૭ વિકેટે કારમી માત આપી દીધી છે. આ ઐતિહાસિક જીત સાથે જ ગુજરાત ટાઇટન્સે આઈપીએલના ઇતિહાસમાં ત્રીજી વખત ફાઇનલમાં પ્રવેશ કરી લીધો છે. હવે ૩૧ મેના રોજ અમદાવાદના નરેન્દ્ર મોદી સ્ટેડિયમમાં રમાનારી ગ્રાન્ડ ફિનાલેમાં ગુજરાતનો સામનો રોયલ ચેલેન્જર્સ બેંગલુરુ (RCB) સામે થશે.

શુક્રવારે મુલ્લાંપુરના મહારાજા યાદવિન્દ્ર સિંહ સ્ટેડિયમમાં રમાયેલા આ નોકઆઉટ મુકાબલામાં રાજસ્થાનની ટીમે પ્રથમ બેટિંગ કરવાનો નિર્ણય કર્યો હતો. પ્રથમ બેટિંગ કરવા ઉતરેલી રાજસ્થાન રોયલ્સની ટીમે નિર્ધારિત ૨૦ ઓવરમાં ૬ વિકેટ ગુમાવીને ૨૧૪ રનનો વિશાળ સ્કોર ખડક્યો હતો. જવાબમાં ગુજરાત ટાઇટન્સે આક્રમક બેટિંગના જોરે માત્ર ૧૮.૪ ઓવરમાં ૩ વિકેટ ગુમાવીને આ લક્ષ્યાંક વટાવી લીધો હતો. આઈપીએલના ઈતિહાસમાં ગુજરાત ટાઇટન્સનો આ અત્યાર સુધીનો સૌથી મોટો સક્સેસફુલ રન ચેઝ (Run Chase) છે.

A ??????? ??? to the #Final ?@gujarat_titans make their way into the #TATAIPL 2026 finale ?

Updates ▶️ https://t.co/eupS8cBPc2#Qualifier2 | #TheFinalLeap | #GTvRR pic.twitter.com/EeKpvawv9O

— IndianPremierLeague (@IPL) May 29, 2026

વૈભવ સૂર્યવંશીની તોફાની ઇનિંગ્સ અને રાજસ્થાનનો સ્કોર
પ્રથમ બેટિંગ કરતા રાજસ્થાન રોયલ્સની શરૂઆત શાનદાર રહી હતી. યુવા બેટ્સમેન વૈભવ સૂર્યવંશીએ મેદાનની ચારેય તરફ ચોગ્ગા-છગ્ગાની વરસાદ કરતા માત્ર ૪૭ બોલમાં ૯૬ રનની વિસ્ફોટક ઇનિંગ્સ રમી હતી, જેમાં તેમણે ૮ ચોગ્ગા અને ૭ ગગનચુંબી છગ્ગા ફટકાર્યા હતા. જોકે, તેઓ માત્ર ૪ રન માટે પોતાની સદી ચૂકી ગયા હતા.

તેમના સિવાય ઓલરાઉન્ડર રવીન્દ્ર જાડેજાએ અણનમ ૪૫ રન અને અંતિમ ઓવરોમાં ડોનોવન ફરેરાએ માત્ર ૧૧ બોલમાં ૩૮ રનની તોફાની ઇનિંગ્સ રમીને ટીમના સ્કોરને ૨૧૪ રન સુધી પહોંચાડ્યો હતો. ગુજરાત તરફથી બોલિંગમાં કગિસો રબાડા અને જેસન હોલ્ડરે ૨-૨ વિકેટ ઝડપી હતી, જ્યારે મોહમ્મદ સિરાજ અને પ્રસિદ્ધ ક્રિષ્નાને ૧-૧ સફળતા મળી હતી.

કેપ્ટન શુભમન ગિલની સદીથી ગુજરાતની આસાન જીત
૨૧૫ રનના વિશાળ લક્ષ્યાંકનો પીછો કરવા ઉતરેલી ગુજરાત ટાઇટન્સની શરૂઆત અત્યંત ધમાકેદાર રહી હતી. કેપ્ટન શુભમન ગિલે મોખરેથી આગેવાની કરતા શાનદાર સદી ફટકારીને રાજસ્થાનના બોલરોને લાઇન-લેન્થ ગુમાવવા મજબૂર કર્યા હતા. ગિલની સદી અને અન્ય બેટ્સમેનોના ઉપયોગી યોગદાનના કારણે ગુજરાતે ૧.૨ ઓવર બાકી રહેતા જ ૩ વિકેટના ભોગે મિસાઈલ ગતિએ મેચ જીતી લીધી હતી. રાજસ્થાનના વૈભવ સૂર્યવંશીની ૯૬ રનની આક્રમક ઇનિંગ્સ આખરે એળે ગઈ હતી.

​​​​​​​૩૧ મેના રોજ અમદાવાદમાં જામશે મહાજંગ
આ જીત સાથે જ ગુજરાતે સાબિત કરી દીધું છે કે પ્લેઓફની મેચોમાં તેમનો રેકોર્ડ કેટલો મજબૂત છે. હવે આગામી રવિવારે એટલે કે ૩૧ મેના રોજ અમદાવાદના હોમ ગ્રાઉન્ડ પર ગુજરાત ટાઇટન્સ અને આઈપીએલ ટ્રોફીની પ્રબળ દાવેદાર ગણાતી રોયલ ચેલેન્જર્સ બેંગલુરુ (RCB) વચ્ચે ફાઇનલનો મહામુકાબલો રમાશે, જેને જોવા માટે અત્યારથી જ ફેન્સમાં ભારે રોમાંચ જોવા મળી રહ્યો છે.