ગુજરાત સરકારે વિદેશમાં ઉચ્ચ શિક્ષણ મેળવવા ઇચ્છતા સામાન્ય વર્ગના વિદ્યાર્થીઓ માટે ફોરેન સ્ટડી લોન યોજનામાં વાર્ષિક કૌટુંબિક આવકની મર્યાદા રૂ. 6 લાખથી વધારીને રૂ. 10 લાખ કરી છે. આ નિર્ણયથી હવે વધુ વિદ્યાર્થીઓને વિદેશ અભ્યાસ માટે નાણાકીય સહાય મેળવવાનો લાભ મળશે.સામાજિક ન્યાય અને અધિકારીતા વિભાગે આ અંગે ઠરાવ જાહેર કર્યો હતો. આ યોજના ગુજરાત બિનઅનામત શૈક્ષણિક અને આર્થિક વિકાસ નિગમ દ્વારા અમલમાં મૂકવામાં આવે છે. યોજનામાં સામાન્ય કેટેગરીના આર્થિક રીતે નબળા વર્ગ એટલે કે ઇડબલ્યુએસ વિદ્યાર્થીઓ માટે આવક મર્યાદામાં વધારો કરવામાં આવ્યો છે.ઠરાવ મુજબ નવી રૂ. 10 લાખની વાર્ષિક આવક મર્યાદા 18 ઓગસ્ટથી લાગુ થશે. જોકે, યોજનાની અન્ય તમામ શરતો અને જોગવાઈઓ યથાવત રહેશે.સરકારના જણાવ્યા અનુસાર, વિદેશમાં ઉચ્ચ અભ્યાસ કરવા ઇચ્છતા વધુ વિદ્યાર્થીઓને નાણાકીય સહાય મળી શકે તે હેતુથી આવક મર્યાદામાં વધારો કરવાનો નિર્ણય લેવામાં આવ્યો છે. અગાઉ જે વિદ્યાર્થીઓના પરિવારની વાર્ષિક આવક રૂ. 6 લાખથી વધુ હોવાથી તેઓ યોજનાનો લાભ મેળવી શકતા નહોતા, પરંતુ હવે તેમની આવક રૂ. 10 લાખ સુધી હોય તો તેઓ પાત્ર બની શકે છે.ગુજરાતમાંથી વિદેશમાં ઉચ્ચ શિક્ષણ માટે જતા વિદ્યાર્થીઓની સંખ્યા સતત વધી રહી છે. ખાસ કરીને અમેરિકા, કેનેડા, બ્રિટન, ઓસ્ટ્રેલિયા સહિતના દેશોમાં અભ્યાસ કરવા માટે વિદ્યાર્થીઓ મોટી સંખ્યામાં અરજી કરે છે. વિદેશમાં અભ્યાસનો ખર્ચ વધુ હોવાથી લોન અને નાણાકીય સહાય વિદ્યાર્થીઓ તથા તેમના પરિવાર માટે મહત્વપૂર્ણ બની રહે છે.આવક મર્યાદા વધારવાના નિર્ણયથી હવે અગાઉની રૂ. 6 લાખની મર્યાદાથી બહાર રહી ગયેલા પરંતુ રૂ. 10 લાખ સુધીની કૌટુંબિક આવક ધરાવતા અનેક વિદ્યાર્થીઓને પણ યોજનાનો લાભ મળવાની શક્યતા છે.સરકારનો આ નિર્ણય વિદેશમાં ઉચ્ચ શિક્ષણ મેળવવા ઇચ્છતા ગુજરાતના મધ્યમ આવક ધરાવતા વિદ્યાર્થીઓ માટે મહત્વપૂર્ણ રાહત માનવામાં આવી રહ્યો છે