2026 ટી20 વર્લ્ડ કપના સૌથી અપેક્ષિત મેચ - ભારત vs પાકિસ્તાન માટે હવે ખૂબ જ ઓછો સમય બાકી છે. બંને ટીમો રવિવાર, 15 ફેબ્રુઆરીના રોજ મેચમાં ટકરાશે. 2025 એશિયા કપમાં બે સૌથી ઉગ્ર ટીમો ત્રણ વખત એકબીજા સામે આવી હતી, જેમાં ફાઇનલનો પણ સમાવેશ થાય છે, અને ત્રણેય વખત ભારતનો વિજય થયો હતો. બંને ટીમો વચ્ચે ટી20 વર્લ્ડ કપમાં ભારતનો 7-1નો દબદબો છે. ક્રિકેટ જગતની સૌથી મોટી મેચોમાંની એક, ભારત vs પાકિસ્તાન, ફરી એકવાર પરત ફરી રહી છે, અને આ ટી20 વર્લ્ડ કપ 2026 મેચ માટે ઉત્સાહ ચરમસીમાએ છે, જેમાં હનુમાનકાઇન્ડ ગાય છે.

સ્ટાર સ્પોર્ટ્સે પુષ્ટિ આપી છે કે કેરળના પ્રખ્યાત ભારતીય રેપર અને ગાયક હનુમાનકાઇન્ડ , ટી20 વર્લ્ડ કપ 2026 માટે આર. પ્રેમદાસા સ્ટેડિયમમાં ચાહકોનું મનોરંજન કરવા માટે તૈયાર છે. તેઓ મેચ પહેલા પરફોર્મ કરશે.ટી20 વર્લ્ડ કપ આયોજકો દ્વારા આ મોટી મેચના વાતાવરણને વધારવાનો આ પ્રયાસ છે. જો કે, રવિવારે કોલંબોમાં ભારે વરસાદની આગાહી કરવામાં આવી છે, ખાસ કરીને બપોર પછી ત્યારે જોવાનું એ રહે છે કે આ જલસો માણવા મળશે કે નહી.

ભારત વિરુદ્ધ પાકિસ્તાન ટી20 વર્લ્ડ કપ મેચ સ્થાનિક સમય મુજબ સાંજે 7:00 વાગ્યે  શરૂ થશે, અને ટોસ મેચ શરૂ થવાના 30 મિનિટ પહેલા થશે. હનુમાનકાઇન્ડનું પરફોર્મન્સ મેચ શરૂ થવાના એક કલાક પહેલા થશે, એટલે કે તે સ્થાનિક સમય  અને ભારતીય સમય મુજબ સાંજે 6:00 વાગ્યે શરૂ થશે.

હનુમાનકાઇન્ડ વિશે વાત કરીએ તો, તેનું સાચું નામ સૂરજ ચેરુકટ છે. તે વિશ્વભરમાં અસાધારણ લોકપ્રિયતા ધરાવતા પ્રખ્યાત રેપર-ગાયક છે. તાજેતરમાં, તેણે ફિલ્મ "ધુરંધર" નું ટાઇટલ ટ્રેક ગાઈને ધ્યાન ખેંચ્યું. તે ઘણી સોફ્ટ ડ્રિંક જાહેરાતોમાં પણ દેખાયા છે.

હનુમાનકાઇન્ડનું ગીત "રન ઇટ અપ" એશિયન સંગીત ચાર્ટમાં ટોચ પર હતું, જેના માટે પીએમ મોદીએ પણ તેમની પ્રશંસા કરી. મન કી બાતમાં બોલતા, વડા પ્રધાન નરેન્દ્ર મોદીએ કહ્યું, "આપણા દેશની રમતગમત લોકપ્રિય પસંદગી બની રહી છે. રેપર હનુમાનકાઇન્ડનું નવું ગીત, રન ઇટ અપ, લોકપ્રિયતા મેળવી રહ્યું છે. તેમાં આપણી પરંપરાગત માર્શલ આર્ટ્સ, જેમ કે કલારીપયટ્ટુ, ગટકા અને થાંગ-તા, દર્શાવવામાં આવી છે. હું હનુમાનકાઇન્ડને તેમના પ્રયાસો માટે અભિનંદન આપું છું, જે વિશ્વભરના લોકોને આપણી પરંપરાગત માર્શલ આર્ટ્સથી વાકેફ કરી રહ્યા છે.