દક્ષિણ ફ્રાન્સમાં મંગળવારે વરસેલા ધોધમાર વરસાદને કારણે ભારે પૂરની સ્થિતિ સર્જાઈ છે, જેના પરિણામે અનેક વિસ્તારોમાં રસ્તાઓ પાણીમાં ડૂબી ગયા છે અને મુખ્ય માર્ગો પર વાહનવ્યવહાર પણ ગંભીર રીતે પ્રભાવિત થયો છે. પ્રાપ્ત માહિતી અનુસાર ફ્રાન્સના બુચેસ-ડુ-રોન ડિપાર્ટમેન્ટ અંતર્ગત આવતા સેન્ટ-માર્ટિન-ડે-ક્રોઉ વિસ્તારમાં રસ્તાઓ પર પાણી ભરાઈ જવાના કારણે સુરક્ષાના ભાગરૂપે કેટલાક રસ્તાઓ બંધ કરી દેવામાં આવ્યા છે, જ્યાં વાહનો પાણીની વચ્ચેથી પસાર થવાની ફરજ પડી રહી છે.

આ તરફ સોમવારે સ્પેનના પૂર્વ ભાગમાં પણ તોફાની વરસાદે ભારે તારાજી સર્જી હતી. સ્પેનમાં આવેલા આ ભીષણ પૂર અને તોફાનની દુર્ઘટનામાં ઓછામાં ઓછા 3 લોકોના મોત થયા હોવાના અહેવાલ છે, જ્યારે જોખમી સ્થિતિને ધ્યાનમાં રાખીને 80,000થી વધુ રહેવાસીઓ માટે ઘરની બહાર ન નીકળવાના આદેશો એટલે કે શેલ્ટર-ઇન-પ્લેસ ઓર્ડર હજુ પણ યથાવત રાખવામાં આવ્યા છે.

સ્ટોર્મ એડમ નામના ખતરનાક વાવાઝોડા અને ભારે વરસાદને કારણે ભૂમધ્ય સમુદ્ર કિનારાના અનેક નાના-મોટા શહેરોનો સંપર્ક બાકીના વિસ્તારો સાથે કપાઈ ગયો છે. નદીઓ બે કાંઠે વહી રહી છે અને તેના પૂરના પાણી રસ્તાઓ પર ફરી વળતા રસ્તાઓ નદીઓ જેવા બની ગયા છે. બે વર્ષ અગાઉ વેલેન્સિયા ક્ષેત્રમાં આવેલા તે ભયાનક અને વિનાશક પૂરની યાદો તાજી થઈ ગઈ છે, જેમાં 230થી વધુ લોકોએ પોતાના પ્રાણ ગુમાવ્યા હતા. સ્પેન અને ફ્રાન્સ બંને દેશોમાં સર્જાયેલી આ કુદરતી આપત્તિને કારણે સ્થાનિક તંત્ર એલર્ટ મોડ પર છે અને પ્રભાવિત વિસ્તારોમાં રાહત તથા બચાવ કામગીરી યુદ્ધના ધોરણે હાથ ધરવામાં આવી રહી છે. પ્રશાસન દ્વારા નાગરિકોને અત્યંત સાવચેતી રાખવા અને બિનજરૂરી મુસાફરી ન કરવા માટેની અપીલ કરવામાં આવી છે.