કેન્દ્રીય નાણાં પ્રધાન નિર્મલા સીતારમણે લોકસભામાં તેમનું સતત નવમું બજેટ રજૂ કર્યું. આ બજેટમાં તેમણે ખેડૂતો અને મહિલાઓ સહિત સામાન્ય જનતા અને વિવિધ ક્ષેત્રો માટે ઘણી મોટી જાહેરાતો કરી. બજેટમાં રેલવે માટે સાત નવા હાઇ-સ્પીડ રેલ કોરિડોરની જાહેરાત કરવામાં આવી છે, જેમાં હૈદરાબાદ-ચેન્નઈ અને ચેન્નઈ-બેંગલુરુ હાઇ-સ્પીડ રેલ કોરિડોરનો સમાવેશ થાય છે. વારાણસી અને સિલિગુડી વચ્ચે હાઇ-સ્પીડ રેલ કોરિડોર પણ બનાવવામાં આવશે. આ કોરિડોર સામાન્ય માણસ માટે હવાઈ મુસાફરીનો વિકલ્પ બનશે. આ ઉપરાંત બજેટમાં ગુજરાત અને પશ્ચિમ બંગાળ વચ્ચે વિશેષ ફ્રેટ કોરિડોરનો પ્રસ્તાવ મૂકવામાં આવ્યો છે.

રેલ્વે મંત્રાલયે બજેટ 2026 અંગે એક નિવેદન બહાર પાડ્યું છે. એક સત્તાવાર નિવેદનમાં, મંત્રાલયે જણાવ્યું હતું કે, નાણાકીય વર્ષ 2026-27 માં રેલવે માટે રૂ. 2,78,030 કરોડની ઐતિહાસિક ફાળવણી કરવામાં આવી છે. 

નાણામંત્રી નિર્મલા સીતારમણે કેન્દ્રીય બજેટમાં સાત હાઇ-સ્પીડ કોરિડોરનો પ્રસ્તાવ મૂક્યો હતો, જેમાં પશ્ચિમ બંગાળના દાનકુની અને ગુજરાતના સુરત વચ્ચે એક નવો સમર્પિત ફ્રેઇટ કોરિડોર પણ સામેલ હતો. તેમણે જણાવ્યું હતું કે તેઓ પર્યાવરણને અનુકૂળ, ટકાઉ માલ પરિવહનને પ્રોત્સાહન આપવા માટે એક સમર્પિત ફ્રેઇટ કોરિડોર બનાવવાનો પ્રસ્તાવ મૂકી રહ્યા છે. અહેવાલો અનુસાર, અમદાવાદ અને મુંબઈ વચ્ચે હાઇ-સ્પીડ કોરિડોર પર હાલમાં કામ ચાલી રહ્યું છે. આ સાથે, ઘણા રાજ્યો અને જિલ્લાઓમાં બે સમર્પિત ફ્રેઇટ કોરિડોર - પૂર્વીય અને પશ્ચિમી - પર પણ કામ ચાલી રહ્યું છે.

આ સાત નવા હાઇ-સ્પીડ રેલ કોરિડોરની જાહેરાત

મુંબઈ-પુણે

પુણે-હૈદરાબાદ

હૈદરાબાદ-બેંગલુરુ

હૈદરાબાદ-ચેન્નાઈ

ચેન્નાઈ-બેંગલુરુ

દિલ્હી-વારાણસી

વારાણસી-સિલિગુડી