સાધુવાસવાણી મુખ્ય રોડ પર અજાણ્યા ટુ વ્હીકલે એક્ટિવાને ઠોકર મારતા એક્ટિવા ચાલક મવડીના આધેડનું ગંભીર ઇજા થવાથી મોત થયું છે. વાહન ચાલક બુલેટ જેવું વ્હીકલ લઈ નાશી છૂટતા પોલીસે તપાસ હાથ ધરી છે.

બનાવની પ્રાપ્ત વિગત મુજબ મવડીમાં રાજદીપ સોસાયટીમાં રહેતાં અને ફર્નિચરનું કામ કરતાં રાજેશભાઈ નરસીભાઇ બોરીચા(પરજીયા કુંભાર) (ઉ.વ.૫૦)ના આધેડ સાંજે સાડા સાતેક વાગ્‍યે એક્‍ટીવા હંકારીને સાધુ વાસવાણી રોડ પરથી જતા હતા ત્યારે રાજ પેલેસ પાસે પહોંચતા પુરપાટ ઝડપે આવતા અજાણ્‍યો ટુ વ્હીલરએ એક્‍ટીવાને ઠોકર મારતા રાજેશભાઇ એક્ટિવા સમેત રોડ પર ફંગોળાતા ગંભીર ઇજા થઇ હતી. બનાવના પગલે આસપાસના દુકાનદારો સહિતના દોડી ગયા હતા અને કોઇએ ૧૦૮ને જાણ કરતા સારવાર માટે સિવિલ હોસ્‍પિટલે ખસેડયા હતાં. અકસ્માતની જાણ પરિવારજનોને ફોન મારફતે કરવામાં આવતા હોસ્પિટલએ દોડી આવ્યા હતા પરંતુ ગંભીર ઇજા થવાથી આજે વહેલી સવારે દમ તોડી દીધો હતો.બનાવ અંગે હોસ્પિટલ ચોકીના સ્ટાફે યુનિવર્સિટી પોલીસને જાણ કરતા પોલીસે જરૂરી કાર્યવાહી કરી હતી.

મૃતક રાજેશભાઇ બે બહેન અને ત્રણ ભાઇમાં નાના હતાં. સંતાનમાં એક દિકરી અને એક દિકરો છે. ફર્નિચર કામ કરી ગુજરાન ચલાવતાં હતાં. કામ પૂરું કરી ઘરે જતા હતા ત્યારે અકસ્માત નડ્યો હતો. પરિચિતના કહેવા મુજબ બુલેટ ચાલકે ઠોકરે મારી અકસ્માત સર્જ્યો હતો. આગળની તપાસ પોલીસે હાથ ધરી છે. આધેડના મૃત્યુથી પરિવારમાં શોક છવાયો છે.