ભુજની જૂની જેલના કમ્પાઉન્ડમાં અચાનક ભયાનક આગ લાગતા પોલીસમાં દોડધામ મચી ગઈ છે. પોલીસે જપ્ત કરેલા વાહનોમાં આગ પ્રસરતા તેમાં બ્લાસ્ટ થતા આસપાસના વિસ્તારોમાં રહેતા લોકોમાં ભયનો માહોલ જોવા મળી રહ્યો છે. જ્યારે આગના કારણે ધૂમાડાના 5થી વધુ કિમીના દૂર દૂર સુધી સાત કિલોમીટર દૂરથી પણ જોવા મળ્યા હતા.

આ વાહનોની ટાંકીમાં પેટ્રોલ અને ડીઝલ હોવાના કારણે આગ અને ગરમીના કારણે વિસ્ફોટ થવાની શક્યતા છે. આગની ઘટનાની જાણ થતા જ પોલીસ અને ફાયરબ્રિગેડ તાત્કાલિક ઘટનાસ્થળે પહોંચી ગયા હતા. ફાયર વિભાગે ઝડપી કામગીરી કરીને આગ પર કાબૂ મેળવ્યો હતો. બંધ જેલમાં વર્ષોથી પડતર રહેલા ટુ-વ્હીલર વાહનોમાં આગ લાગી હોવાનું સામે આવ્યું છે. પોલીસ દ્વારા સ્થળને સુરક્ષિત કરવામાં આવ્યું છે.

પેટ્રોલ-ડીઝલને કારણે આગ વિકરાળ

જેલ કમ્પાઉન્ડમાં પોલીસે જપ્ત કરેલા વાહનોમાં આગ લાગતા અનેક ધડાકા અને વિસ્ફોટ થયા હતા. બી ડિવિઝન પોલીસ સ્ટેશન નજીક બનેલી આ ઘટનામાં જપ્ત કરાયેલા વાહનોની ટાંકીમાં રહેલા પેટ્રોલ-ડીઝલને કારણે આગે વિકરાળ સ્વરૂપ ધારણ કર્યું હતું.

આગ પાછળનું ચોક્કસ કારણ સામે આવ્યું નથી

આગ લાગવાનું ચોક્કસ કારણ હજુ જાણવા મળ્યું નથી. વિવિધ વિભાગના અધિકારીઓ ઘટનાસ્થળે પહોંચીને તપાસ કરી રહ્યા છે. સદનસીબે આ ઘટનામાં કોઈ જાનહાની થઈ નથી. આ આગની ઘટનાએ સ્થાનિક લોકોમાં ભય અને ચિંતાનો માહોલ સર્જી દીધો છે. આગના કારણો અને નુકસાનની વિગતવાર તપાસ કરવામાં આવી રહી છે.