ફ્રાન્સના પેરિસ સેન્ટ-જર્મેન (PSG) ફૂટબોલ ક્લબે આર્સેનલ સામે ચેમ્પિયન્સ લીગની ફાઇનલ જીત્યા બાદ સમગ્ર ફ્રાન્સમાં વિજય ઉત્સવ હિંસામાં ફેરવાઈ ગયો છે. ફૂટબોલ ચાહકો અને પોલીસ વચ્ચે ફાટી નીકળેલા આ ભયાનક રમખાણોમાં અત્યાર સુધીમાં ૫૭ પોલીસકર્મીઓ સહિત કુલ ૨૧૯ લોકો ઘાયલ થયા છે.

સ્થિતિ એટલી હદે વણસી ગઈ હતી કે પેરિસમાં બસ, ટ્રેન અને રેલવે સેવાઓ સંપૂર્ણપણે પ્રભાવિત થઈ ગઈ છે. ફ્રાન્સના ગૃહમંત્રી લોરેન્ટ નુનેઝે આ હિંસા અંગે કડક કાર્યવાહીની જાહેરાત કરી છે. પેરિસમાં બનેલી આ ભયાનક ઘટના અને હાલની સુરક્ષા વ્યવસ્થા અંગેનો સંપૂર્ણ વિગતવાર અહેવાલ છે.

ફ્રાન્સના ગૃહમંત્રી લોરેન્ટ નુનેઝના જણાવ્યા અનુસાર, ફાઇનલ મેચમાં પીએસજી (PSG) ની જીત બાદ ફાટી નીકળેલી હિંસામાં ઘાયલ થયેલા લોકોમાંથી ૮ લોકોની હાલત અત્યંત ગંભીર છે. ફ્રાન્સ પ્રશાસને અત્યાર સુધીમાં હિંસક પ્રવૃત્તિઓમાં સામેલ ૭૮૦ લોકોની ધરપકડ કરી છે, જેમાંથી ૪૫૦ થી વધુ તોફાનીઓ હાલ પોલીસ કસ્ટડીમાં છે.

પેરિસના રસ્તાઓ પર આગજની અને તોડફોડ
સ્થાનિક ટીમ પીએસજી પેનલ્ટી શૂટઆઉટમાં જીતી જતાં જ હજારો ચાહકો પેરિસના પ્રખ્યાત ચેમ્પ્સ-એલિસીસ (Champs-Élysées) રોડ પર ઉતરી આવ્યા હતા. જોતજોતામાં આ ઉજવણી હિંસામાં ફેરવાઈ ગઈ હતી. તોફાની તત્વો દ્વારા રસ્તાઓ પર ઇલેક્ટ્રિક બાઇક્સ સળગાવી દેવામાં આવી હતી અને અનેક દુકાનોના કાચ તોડી નાખવામાં આવ્યા હતા. ભીડને વિખેરવા માટે પેરિસ સેન્ટ્રલમાં પોલીસે ટીયર ગેસના સેંકડો શેલ છોડ્યા હતા. માત્ર પેરિસ શહેરમાંથી જ ૪૮૦ લોકોની ધરપકડ કરાઈ છે, જેમાં ૮૨ સગીરોનો પણ સમાવેશ થાય છે. પકડાયેલા લોકો પર પોલીસ પર હુમલો, સરકારી સંપત્તિને નુકસાન, ચોરી અને ગેરકાયદેસર હથિયારો રાખવાના ગંભીર આરોપો છે.

એક યુવકનું કરુણ મોત, અન્ય એક ગંભીર
આ રમખાણો દરમિયાન પેરિસના રિંગ રોડને તોફાનીઓએ બ્લોક કરવાનો પ્રયાસ કર્યો હતો, જ્યાં બનેલા એક અકસ્માતમાં ૨૪ વર્ષના એક યુવકનું મોત નીપજ્યું છે. પ્રત્યક્ષદર્શીઓના મતે તે મોટરસાઇકલ પર જઈ રહ્યો હતો ત્યારે સિમેન્ટના બ્લોક્સ સાથે અથડાયો હતો. આ ઉપરાંત, પેરિસના અન્ય એક વિસ્તારમાં થયેલી જૂથ અથડામણમાં એક સગીર વયનો છોકરો પણ ગંભીર રીતે ઘાયલ થયો છે, જે હોસ્પિટલમાં જીવન-મરણ વચ્ચે ઝોલા ખાઈ રહ્યો છે.

ગૃહમંત્રી અને વિપક્ષી નેતાઓના આકરા પ્રહારો
ગૃહમંત્રી લોરેન્ટ નુનેઝે પત્રકારોને જણાવ્યું કે, "અમે સભા કરવાની સ્વતંત્રતા આપીએ છીએ, પરંતુ આવી હિંસા સહન કરવામાં આવશે નહીં. જીતની ઉજવણી કરવા માટે સામાન્ય લોકો જ બહાર આવ્યા હતા, પરંતુ કેટલાક એવા અસામાજિક તત્વો જેઓ પીએસજીના સમર્થકો પણ નથી, તેઓ માત્ર હિંસા ફેલાવવા આવ્યા હતા. અમારી પોલીસ આ તોફાનીઓ સામે અત્યંત કડક વલણ અપનાવશે."

બીજી તરફ, ફ્રાન્સના દક્ષિણપંથી (Far-right) નેતા મરીન લે પેને સોશિયલ મીડિયા પ્લેટફોર્મ X પર સરકારની આકરી ટીકા કરતા લખ્યું કે, "માત્ર ફ્રાન્સમાં જ એક ફૂટબોલ ક્લબની જીત આવા રમખાણોમાં પરિણમે છે. માત્ર આપણા દેશમાં જ લોકોએ વિજયની રાત્રે હિંસાથી બચવા માટે પોતાના ઘરોમાં કેદ થઈ જવું પડે છે."

આજે એફિલ ટાવર પર વિક્ટરી પરેડ
ગયા વર્ષે પણ પીએસજીની જીત બાદ આવી જ ભયાનક હિંસા થઈ હતી, જેમાં કેટલાક લોકોના મોત થયા હતા. આ વર્ષે આવી કોઈ મોટી દુર્ઘટના ન સર્જાય તે માટે રવિવારે એફિલ ટાવર (Eiffel Tower) અને ચેમ્પ-દ-માર્સ ખાતે યોજાનારી સત્તાવાર વિક્ટરી પરેડ માટે અગાઉથી જ ૬,૦૦૦ થી વધુ સશસ્ત્ર પોલીસ જવાનોને તૈનાત કરી દેવામાં આવ્યા છે. આ પરેડ બાદ ફ્રાન્સના રાષ્ટ્રપતિ ઇમેન્યુઅલ મેક્રોન વિજેતા ખેલાડીઓનું સન્માન કરવા માટે એક વિશેષ કાર્યક્રમ યોજવાના છે.