વિચિત્ર અને આક્રમક નિર્ણયો લઈ જગત આખાને દોડતું કરી દેનારા ટ્રમ્પએ વધુ એક વિવાદાસ્પદ પોસ્ટ મુકીને દુનિયાને ચોંકાવી દીધી છે. પોતાની જાતને વેનેઝુએલાનો કાર્યકારી રાષ્ટ્રપતિ ગણાવીને ટ્રમ્પએ ખળભળાટ મચાવી દીધો છે.નોંધનીય છે કે આ મહિનાની શરૂઆતમાં, યુએસએ વેનેઝુએલા સામે મોટા પાયે કાર્યવાહી શરૂ કરી હતી અને વેનેઝુએલા રાષ્ટ્રપતિ નિકોલસ માદુરોની ધરપકડ કરી હતી. તેમને તેમની પત્ની, સેલિયા ફ્લોરેસ સાથે ન્યૂયોર્ક લઈ જવામાં આવ્યા હતા, જ્યાં તેમના પર નાર્કો-આતંકવાદના કાવતરાનો આરોપ મૂકવામાં આવ્યો હતો.આ પછી, ટ્રમ્પે કહ્યું કે યુએસ "જ્યાં સુધી સુરક્ષિત, ન્યાયી અને સમજદાર સંક્રમણ ન થાય ત્યાં સુધી વેનેઝુએલા પર શાસન ચાલુ રાખશે. આપણે એવી વ્યક્તિને વેનેઝુએલા પર કબજો કરવા દેવાનું જોખમ લઈ શકતા નથી જે વેનેઝુએલા લોકોના શ્રેષ્ઠ હિતોને ધ્યાનમાં રાખતો નથી.આ રીતે આડકતરી રીતે ટ્રમ્પ એ વેનેઝુએલા પર પોતાનું વર્ચસ્વ જળવાઈ રહે તેવા પગલાં અમલી બનાવી દીધા.

આ પછી, ગયા અઠવાડિયે વેનેઝુએલાના ઉપરાષ્ટ્રપતિ અને તેલ મંત્રી, ડેલ્સી રોડ્રિગ્ઝે ઔપચારિક રીતે દેશના વચગાળાના રાષ્ટ્રપતિ તરીકે શપથ લીધા. ત્યારબાદ ટ્રમ્પે જણાવ્યું હતું કે વેનેઝુએલાના વચગાળાના અધિકારીઓ અમેરિકાને 30 થી 50 મિલિયન બેરલ "ઉચ્ચ ગુણવત્તાવાળા, માન્ય તેલ" પૂરા પાડશે, જે બજાર ભાવે વેચવામાં આવશે.અગાઉ, અહેવાલો બહાર આવ્યા હતા કે ટ્રમ્પ વેનેઝુએલા પર વધુ તેલ કાઢવાની મંજૂરી આપતા પહેલા ચીન, રશિયા, ઈરાન અને ક્યુબા સાથેના આર્થિક સંબંધો સમાપ્ત કરવા દબાણ કરી રહ્યા હતા. એબીસી ન્યૂઝે સૂત્રોને ટાંકીને અહેવાલ આપ્યો છે કે ટ્રમ્પ વહીવટીતંત્ર ઇચ્છે છે કે વેનેઝુએલા તેલ ઉત્પાદન માટે ફક્ત અમેરિકા સાથે ભાગીદારી કરે અને ક્રૂડ તેલ વેચતી વખતે અમેરિકાને પ્રાથમિકતા આપે. જો કે આ મુદ્દો ચર્ચા હેઠળ છે.