આઈપીએલ ૨૦૨૬ (IPL 2026) ની લીગ સ્ટેજના છેલ્લા દિવસે પ્લેઓફનું રોમાંચક ચિત્ર હવે સંપૂર્ણપણે સ્પષ્ટ થઈ ગયું છે. રવિવારે રમાયેલી નિર્ણાયક મેચમાં રાજસ્થાન રોયલ્સે મુંબઈ ઈન્ડિયન્સને હરાવીને પ્લેઓફમાં ક્વોલિફાય કરનારી ચોથી અને અંતિમ ટીમ બનવાનું ગૌરવ મેળવ્યું છે. રાજસ્થાનની આ જીત સાથે જ પંજાબ કિંગ્સ અને કોલકાતા નાઈટ રાઈડર્સની પ્લેઓફમાં પહોંચવાની આશાઓ પર પાણી ફરી વળ્યું છે અને આ બંને ટીમો ટૂર્નામેન્ટમાંથી બહાર થઈ ગઈ છે.

મુંબઈના વાનખેડે સ્ટેડિયમમાં રવિવારે રમાયેલા ડબલ હેડરના પ્રથમ અને સીઝનના ૬૯મા મુકાબલામાં રાજસ્થાન રોયલ્સ માટે જીત અત્યંત જરૂરી હતી. રાજસ્થાને પ્રથમ બેટિંગ કરતા ૨૦૫ રનનો વિશાળ સ્કોર ખડક્યો હતો, જેની સામે મુંબઈ ઈન્ડિયન્સની ટીમ માત્ર 175 રન જ બનાવી શકી હતી. ૩૦ રનથી મેળવેલી આ શાનદાર જીત સાથે રાજસ્થાને ૧૬ પોઈન્ટ્સ મેળવીને પ્લેઓફમાં એન્ટ્રી કરી લીધી છે.

પોઈન્ટ્સ ટેબલની આખરી સ્થિતિ
લીગ સ્ટેજ સમાપ્ત થયા બાદ ટોપ-૪ ટીમોનું સ્થાન અને પોઈન્ટ્સ નીચે મુજબ નક્કી થયા છે:

રોયલ ચેલેન્જર્સ બેંગલુરુ: ૧૮ પોઈન્ટ્સ સાથે પોઈન્ટ્સ ટેબલમાં પ્રથમ સ્થાને રહી.

ગુજરાત ટાઇટન્સ: ૧૮ પોઈન્ટ્સ સાથે બીજા સ્થાને રહી (નેટ રનરેટના આધારે).

સનરાઈઝર્સ હૈદરાબાદ: ૧૮ પોઈન્ટ્સ સાથે ત્રીજા સ્થાન પર રહી.

રાજસ્થાન રોયલ્સ: ૧૬ પોઈન્ટ્સ સાથે ચોથા સ્થાને રહીને ક્વોલિફાય કર્યું.

પ્લેઓફનો સંપૂર્ણ શિડ્યુલ
નિયમો અનુસાર પોઈન્ટ્સ ટેબલની ટોપ-૨ ટીમો વચ્ચે પ્રથમ ક્વોલિફાયર રમાશે, જ્યારે ત્રીજા અને ચોથા નંબરની ટીમ વચ્ચે એલિમિનેટર મેચ રમાશે. આ તમામ હાઈ-વોલ્ટેજ મેચોની વિગતો નીચે મુજબ છે:

ક્વોલિફાયર-૧ (Qualifier 1): વર્તમાન ચેમ્પિયન રોયલ ચેલેન્જર્સ બેંગલુરુ અને ગુજરાત ટાઇટન્સ વચ્ચે જંગ જામશે. આ મેચ ૨૬ મેના રોજ ધર્મશાલા ખાતે રમાશે.

એલિમિનેટર (Eliminator): સનરાઈઝર્સ હૈદરાબાદ અને રાજસ્થાન રોયલ્સ વચ્ચે કરો કે મરો નો મુકાબલો થશે. આ મેચ ૨૭ મેના રોજ ન્યૂ ચંદીગઢમાં રમાશે.

ક્વોલિફાયર-૨ (Qualifier 2): એલિમિનેટર મેચની વિજેતા ટીમ અને ક્વોલિફાયર-૧ માં હારેલી ટીમ વચ્ચે ફાઇનલમાં પહોંચવા માટે ટક્કર થશે. આ મેચ ૨૯ મેના રોજ ન્યૂ ચંદીગઢમાં રમાશે.

ફાઇનલ (The Grand Finale): ક્વોલિફાયર-૧ ની વિજેતા અને ક્વોલિફાયર-૨ ની વિજેતા ટીમ વચ્ચે આઈપીએલ ૨૦૨૬ ની ટ્રોફી માટે મહાજંગ જામશે. આ ગ્રાન્ડ ફિનાલે ૩૧ મેના રોજ અમદાવાદના નરેન્દ્ર મોદી સ્ટેડિયમમાં રમાશે.