યુએસએના મિનેસોટાના મિનેપોલિસમાં ટ્રમ્પ વહીવટીતંત્રના નવા ઇમિગ્રેશન કાર્યવાહી દરમિયાન એક મહિલાની ગોળી મારીને હત્યા કરવામાં આવી હતી. ઇમિગ્રેશન અને કસ્ટમ્સ એન્ફોર્સમેન્ટ અધિકારીએ મહિલાની કારની અંદર તેણીને ગોળી મારી હતી. ફેડરલ અધિકારીઓ કહે છે કે મહિલાએ અધિકારીઓ પર હુમલાનો પ્રયાસ કર્યો હતો અને ગોળીબાર સ્વ-બચાવમાં કરવામાં આવ્યો હતો, જ્યારે શહેરના મેયરે આ કાર્યવાહીને બેદરકારી અને બિનજરૂરી ગણાવી હતી. મહિલાની ઓળખ રેની ગુડ તરીકે કરવામાં આવી છે. આ ઘટનાથી વિસ્તારમાં તણાવ અને વિરોધ પ્રદર્શનો શરૂ થયા હતા.આ ઘટના મિનિયાપોલિસના રહેણાંક વિસ્તારમાં બની હતી. યુએસ ડિપાર્ટમેન્ટ ઓફ હોમલેન્ડ સિક્યુરિટીના પ્રવક્તા ટ્રિશિયા મેકલોફલિને જણાવ્યું હતું કે આઈસીઈ અધિકારીએ મહિલાને તેના વાહનની અંદર ગોળી મારી હતી. તેણીનું ઘટનાસ્થળે જ મૃત્યુ થયું હતું. તપાસ ચાલુ છે.

સોશિયલ મીડિયા પર ફરતા એક વીડિયોમાં એક આઈસીઈ અધિકારી રસ્તાની વચ્ચે રોકાયેલી એસયુવી પાસે જઈને ડ્રાઇવરને દરવાજો ખોલવાનું કહે છે. તે વાહનનું સ્ટીયરિંગ વ્હીલ પકડી લે છે. આ દરમિયાન, એસયુવી આગળ વધવા લાગે છે.

ડોનાલ્ડ ટ્રમ્પે સોશિયલ મીડિયા પર લખ્યું, "મેં હમણાં જ મિનેસોટાના મિનિયાપોલિસમાં બનેલી ઘટનાનો વીડિયો જોયો. તે જોવું ભયાનક છે. ચીસો પાડતી મહિલા સ્પષ્ટપણે એક વ્યાવસાયિક ઉશ્કેરણી કરનાર હતી, અને કાર ચલાવતી મહિલા અત્યંત અવ્યવસ્થિત હતી, જે અધિકારીઓને અવરોધતી અને પ્રતિકાર કરતી હતી. ત્યારબાદ તે જાણી જોઈને, હિંસક અને ક્રૂર રીતે અધિકારી પર હુમલો કરવા દોડી હતી , જેના કારણે અધિકારીએ સ્વબચાવમાં ગોળીબાર કર્યો.

વીડિયોમાં સ્પષ્ટપણે દેખાય છે કે વાહનની સામે ઉભેલા બીજા અધિકારીએ તરત જ પોતાનું હથિયાર ખેંચ્યું અને નજીકથી એસયુવી પર ઓછામાં ઓછા બે ગોળીબાર કર્યા. વાહન નજીક આવતાં જ, અધિકારી પાછળ કૂદી પડ્યો. વીડિયો પરથી સ્પષ્ટ નથી કે વાહને અધિકારીને ટક્કર મારી કે નહીં. ગોળીબાર પછી, એસયુવી નજીકના ફૂટપાથ પર પાર્ક કરેલી બે કાર સાથે અથડાઈ અને પછી બંધ થઈ ગઈ. મહિલાને હોસ્પિટલમાં લઈ જવામાં આવી, પરંતુ ડોક્ટરોએ તેને મૃત જાહેર કરી.

આ ઘટનાને ટ્રમ્પ વહીવટીતંત્ર દરમિયાન મુખ્ય યુએસ શહેરોમાં ચાલી રહેલા ઇમિગ્રેશન ક્રેકડાઉનનો સિલસિલો માનવામાં આવે છે. 2024 થી વિવિધ રાજ્યોમાં આવા ઓપરેશન દરમિયાન ઓછામાં ઓછા પાંચ લોકોના મોત થયા છે.

મિનિયાપોલિસ અને સેન્ટ પોલમાં ભયનો માહોલ

મંગળવારે, ડીએચએસએ મિનિયાપોલિસ અને સેન્ટ પોલમાં મોટા પાયે ઇમિગ્રેશન ઓપરેશનની જાહેરાત કરી. આ ઓપરેશનમાં આશરે 2,000 એજન્ટો અને અધિકારીઓ સામેલ છે. આ ઓપરેશનને કેટલાક કિસ્સાઓમાં, સોમાલી સમુદાય સાથે સંકળાયેલા કથિત છેતરપિંડી સાથે પણ જોડવામાં આવી રહ્યું છે. ત્યારથી, બંને શહેરોમાં ભય અને ચિંતાનું વાતાવરણ છવાઈ ગયું છે.

ગોળીબાર બાદ વિરોધ પ્રદર્શન શરુ

ઘટના બાદ, મોટી સંખ્યામાં લોકો ઘટનાસ્થળે એકઠા થયા હતા અને સ્થાનિક અને સંઘીય અધિકારીઓ વિરુદ્ધ સૂત્રોચ્ચાર કર્યા હતા. વિરોધીઓએ "શેમ ઓન યુ" અને "ગેટ આઈસીઈ આઉટ ઓફ મિનેસોટા" જેવા નારા લગાવ્યા હતા અને વિરોધ કરવા માટે સીટીઓ વગાડી હતી. મિનિયાપોલિસના મેયર જેકબ ફ્રેએ કહ્યું હતું કે ઇમિગ્રેશન એજન્ટો શહેરમાં અરાજકતા ફેલાવી રહ્યા હતા. તેઓએ સોશિયલ મીડિયા પર લખ્યું, "અમે માંગ કરીએ છીએ કે આઈસીઈ તાત્કાલિક શહેર અને રાજ્ય છોડી દે. અમે અમારા ઇમિગ્રન્ટ અને શરણાર્થી સમુદાયો સાથે મજબૂત રીતે ઉભા છીએ.જે વિસ્તારમાં ગોળીબાર થયો તે વિસ્તાર મિનિયાપોલિસના ડાઉનટાઉનની દક્ષિણે છે. આ વિસ્તાર જૂના ઇમિગ્રન્ટ બજારોની નજીક છે અને 2020 માં જ્યાં જ્યોર્જ ફ્લોયડનું પોલીસ કસ્ટડીમાં મૃત્યુ થયું હતું તે સ્થળથી લગભગ એક માઇલ દૂર છે