શક્તિપીઠ અંબાજી ખાતે ગબ્બરગઢ પર જવા માટેની લોકપ્રિય રોપ-વે સેવા આગામી ૨૩ ફેબ્રુઆરી થી ૨૮ ફેબ્રુઆરી ૨૦૨૬ સુધી સતત ૬ દિવસ માટે બંધ રાખવામાં આવશે. હોળી-ધુળેટીના મોટા તહેવારો પૂર્વે યાત્રિકોની સુરક્ષાને સર્વોપરી ગણીને વહીવટી તંત્ર અને રોપ-વે સંચાલકો દ્વારા આ મહત્વનો નિર્ણય લેવામાં આવ્યો છે.

શા માટે લેવાયો આ નિર્ણય?
કોઈપણ યાંત્રિક સુવિધામાં સમયાંતરે 'સર્વિસ' અને 'મેન્ટેનન્સ' અનિવાર્ય હોય છે. લાખો યાત્રિકોની સુરક્ષા સાથે કોઈ બાંધછોડ ન થાય તે હેતુથી દર વર્ષે વાર્ષિક મેન્ટેનન્સ કરવામાં આવે છે. હોળી અને ધુળેટી દરમિયાન અંબાજીમાં શ્રદ્ધાળુઓનો ભારે ધસારો રહેતો હોય છે. તે પૂર્વે રોપ-વેની તમામ મશીનરી, વાયર અને ટ્રોલીનું બારીકાઈથી ચેકિંગ કરવામાં આવશે જેથી તહેવારોમાં કોઈ ટેકનિકલ ખામી ન સર્જાય.

​​​​​​​દર્શન માટેનો પર્યાય
જે યાત્રિકો આ ૬ દિવસ દરમિયાન અંબાજી પહોંચવાના છે, તેમણે ગબ્બરના દર્શન માટે હવે પગથિયાં ચઢીને જવું પડશે. રોપ-વે બંધ હોવા છતાં ગબ્બર પર દર્શન માટે પગથિયાંનો માર્ગ ખુલ્લો રહેશે. વડીલો અને બાળકો સાથે આવતા યાત્રિકોને આ સમયગાળા દરમિયાન ખાસ આયોજન સાથે આવવા વિનંતી કરવામાં આવી છે.