દેશની સૌથી મોટી એરલાઈન કંપની ઈન્ડિગોએ હવાઈ મુસાફરોને મોટો આંચકો આપતા 6 ઓક્ટોબર 2026 થી ડોમેસ્ટિક અને ઈન્ટરનેશનલ બંને રૂટ પર ફ્યુઅલ સરચાર્જ વધારવાની સત્તાવાર જાહેરાત કરી છે. 1 ઓક્ટોબરથી એવિએશન ટર્બાઈન ફ્યુઅલ (ATF) એટલે કે જેટ ફ્યુઅલની કિંમતોમાં 13.2% નો તોતિંગ વધારો થયો છે. છેલ્લા ત્રણ મહિનામાં જેટ ફ્યુઅલના ભાવમાં આશરે 25% જેટલો મોટો ઉછાળો આવ્યો છે, જેને ધ્યાનમાં રાખીને એરલાઈન કંપનીએ આ નિર્ણય લેવો પડ્યો છે. આ નવા દરો 6 ઓક્ટોબરના રોજ મધ્યરાત્રિ 12:01 વાગ્યા પછીથી થનારા તમામ નવા બુકિંગ પર લાગુ થઈ જશે.

ઈન્ડિગોના જણાવ્યા અનુસાર, ડોમેસ્ટિક (ઘરેલું) ફ્લાઈટ્સ માટે અંતરના આધારે પ્રતિ સેક્ટર ફ્યુઅલ ચાર્જ ₹375 થી વધીને ₹1,300 સુધી રહેશે. આ અગાઉ એપ્રિલ મહિનામાં નક્કી કરાયેલા દરો મુજબ આ ચાર્જ ₹275 થી ₹950 ની વચ્ચે હતો. બીજી તરફ, આંતરરાષ્ટ્રીય (ઈન્ટરનેશનલ) રૂટ માટે આ ફ્યુઅલ ચાર્જ ₹1,000 થી લઈને ₹10,000 સુધી પહોંચી જશે. જેટ ફ્યુઅલના ભાવ 1 ઓક્ટોબરથી ₹121 પ્રતિ લીટરથી વધીને ₹137 પ્રતિ લીટર થઈ ગયા છે, જે છેલ્લા એક દાયકાના સૌથી ઉચ્ચ સ્તરે છે.

અંતરરાષ્ટ્રીય રૂટની વાત કરીએ તો સાર્ક (SAARC) દેશો માટે 500 કિલોમીટર સુધીના અંતર માટે ₹1,000 અને તેથી વધુ અંતર માટે ₹3,000 નો ચાર્જ લાગશે. સાઉથ-ઈસ્ટ એશિયા, મિડલ ઈસ્ટ અને નોર્થ-ઈસ્ટ એશિયા રૂટ માટે આ ચાર્જ ₹5,500 નક્કી કરાયો છે. આ ઉપરાંત આફ્રિકાના રૂટ માટે ₹6,000 અને યુરોપની ફ્લાઈટ્સ માટે ફ્યુઅલ ચાર્જ ₹10,000 કરવામાં આવ્યો છે. કોઈપણ એરલાઈનના કુલ સંચાલન ખર્ચમાં જેટ ફ્યુઅલનો હિસ્સો સૌથી વધુ હોય છે.

​​​​​​​
​​​​​​​ઈન્ડિગો એરલાઈને ગ્રાહકોને પડેલી અસૌવિધા બદલ ખેદ વ્યક્ત કરતાં જણાવ્યું છે કે ઓપરેટિંગ કોસ્ટમાં સતત થઈ રહેલા વધારાના કારણે આ નિર્ણય લેવો અનિવાર્ય બન્યો હતો. કંપનીએ ઉમેર્યું કે ફ્યુઅલની કિંમતોમાં થયેલા તોતિંગ વધારાની સરખામણીમાં ગ્રાહકો પર ઓછો બોજ પડે તે માટે ખૂબ જ સંતુલિત અને મર્યાદિત વધારો કરવામાં આવ્યો છે. ઉલ્લેખનીય છે કે 5 ઓક્ટોબરના રોજ બીએસઈ (BSE) પર ઈન્ડિગોની માલિકી ધરાવતી કંપની ઈન્ટરગ્લોબ એવિયેશનના શેર ₹4,927.15 પર ટ્રેડ થઈ રહ્યા હતા.