5G કરતા 100 ગણી ઝડપી સેવા પ્રદાન કરી ભારતની વૈશ્વિક ટેકનોલોજી લીડર બનવા તરફ આગેકુચ જારી રહી છે અને ભારત હવે 6G પેટન્ટ ફાઇલ કરનારા વિશ્વના ટોચના છ દેશોમાં સામેલ થઈ ગયો છે. 6G સંપૂર્ણપણે નવા ઉદ્યોગોનું સર્જન કરશે અને હાલના ઉદ્યોગોમાં ક્રાંતિ લાવશે તેવી જાહેરાત કરતા કેન્દ્રીય દૂરસંચાર રાજ્યમંત્રી ચંદ્રશેખર પેમ્માસાનીએ વધુમાં જણાવ્યું હતું કે ભારતમાં ૧૧૧ થી વધુ સંશોધન પ્રોજેક્ટ્સને ૩૦૦ કરોડ રૂપિયાની મંજૂર રકમથી ભંડોળ પૂરું પાડવામાં આવ્યું છે.

પેમ્માસાનીએ 'ઇન્ડિયા 6G 2025' કોન્ફરન્સમાં જણાવ્યું હતું કે 6G ટેરાહર્ટ્ઝ ફ્રીક્વન્સી બેન્ડનો ઉપયોગ કરશે, જે પ્રતિ સેકન્ડ એક ટેરાબીટ સુધીના ડેટા રેટને મંજૂરી આપશે જે 5G કરતા 100 ગણો ઝડપી છે. આપણી પાસે પ્રતિભાનો વિશાળ ભંડાર છે અને પુષ્કળ સમય છે. 6G માં અગ્રણી ન બનવાનું કોઈ કારણ નથી લાગતું.તેમણે કહ્યું કે જેમ જેમ ભારત વૈશ્વિક ટેકનોલોજી લીડર બનવા તરફ પોતાની સફર ચાલુ રાખે છે, તેમ તેમ 6G ટેકનોલોજી સાથેનો તેનો આગળનો માર્ગ આવનારા દાયકાઓ સુધી દેશની સમૃદ્ધિને વ્યાખ્યાયિત કરશે. મંત્રીએ જણાવ્યું હતું કે 6G સંપૂર્ણપણે નવા ઉદ્યોગોનું નિર્માણ કરશે અને હાલના ઉદ્યોગોમાં ક્રાંતિ લાવશે, જે 2035 સુધીમાં ભારતના અર્થતંત્રમાં 1,000 બિલિયન ડોલરનો ઉમેરો કરવાની સંભાવના ધરાવે છે. સ્વદેશી 6G વિકાસ એ પણ સુનિશ્ચિત કરશે કે આપણા સુરક્ષિત સંદેશાવ્યવહાર ભારતમાં વિકસિત અને સુરક્ષિત થાય.

દિલ્હી-એનસીઆરમાં આજથી વોડા-આઈડિયાની 5G સેવા શરૂ

ટેલિકોમ સેવા પ્રદાતા વોડાફોન-આઈડિયા આજથી દિલ્હી-એનસીઆરમાં તેની 5G સેવાઓ શરૂ કરશે. કંપનીએ જણાવ્યું હતું કે તે આ વર્ષે ઓગસ્ટ સુધીમાં 5G સ્પેક્ટ્રમ મેળવનારા તમામ 17 પ્રાથમિકતા ક્ષેત્રોમાં 5G સેવાઓ શરૂ કરવા માટે તૈયાર છે. કંપનીએ જણાવ્યું હતું કે, રાજધાની ક્ષેત્ર વીઆઈ ના વધતા 5G રોલઆઉટમાં જોડાય છે, જે સુવિધાના પ્રારંભિક તબક્કાનો એક ભાગ છે. આ અંતર્ગત, તે મુંબઈ, ચંદીગઢ અને પટનામાં શરૂ થઈ ચૂક્યું છે. વીઆઈની 5G સેવા 17 સર્કલમાં ત્રણ વર્ષમાં આયોજિત રૂ. 55,000 કરોડના મૂડી ખર્ચનો એક ભાગ છે. તેણે જણાવ્યું હતું કે તેની પ્રારંભિક 5G ઓફરમાં 5G-સક્ષમ ઉપકરણો ધરાવતા વપરાશકર્તાઓ માટે 299 રૂપિયાથી શરૂ થતા પ્લાન પર અમર્યાદિત ડેટાનો સમાવેશ થાય છે.