ભારતીય અંડર-19 ક્રિકેટ ટીમે ફરી એકવાર વિશ્વ ક્રિકેટમાં પોતાનું વર્ચસ્વ સાબિત કર્યું છે. બુધવારે રમાયેલી રોમાંચક સેમીફાઇનલમાં ભારતની યુવા બ્રિગેડે અફઘાનિસ્તાનને 7 વિકેટે હરાવીને 10મી વખત અંડર-19 વર્લ્ડ કપની ફાઇનલમાં પ્રવેશ કર્યો છે. હવે ખિતાબી જંગ 6 ફેબ્રુઆરીએ ઈંગ્લેન્ડ સામે રમાશે.

અફઘાનિસ્તાનના બે બેટ્સમેનોની સદી છતાં ભારત મક્કમ
હરારે સ્પોર્ટ્સ ક્લબ ખાતે રમાયેલી આ મેચમાં અફઘાનિસ્તાને ટોસ જીતીને પ્રથમ બેટિંગ કરવાનો નિર્ણય લીધો હતો. અફઘાન ટીમે નિર્ધારિત 50 ઓવરમાં 4 વિકેટ ગુમાવીને 310 રનનો વિશાળ સ્કોર ખડક્યો હતો. અફઘાનિસ્તાન તરફથી ફૈઝલ શિનોઝાદાએ 110 રન અને ઉઝૈરુલ્લા નિયાઝઈએ અણનમ 101 રન બનાવીને શાનદાર સદી ફટકારી હતી. વિશાળ સ્કોર છતાં ભારતીય બોલરોએ મધ્ય ઓવરોમાં અંકુશ રાખ્યો હતો. દીપેશ દેવેન્દ્રન અને કનિષ્ક ચૌહાણે બે-બે વિકેટ ઝડપી હતી.

રેકોર્ડબ્રેક રન ચેઝ
311 રનના પહાડ જેવા લક્ષ્યનો પીછો કરવા ઉતરેલી ભારતીય ટીમની શરૂઆત આક્રમક રહી હતી. ભારતે માત્ર 41.1 ઓવરમાં 3 વિકેટ ગુમાવીને જીત મેળવી લીધી હતી. ઓપનર આરોન જ્યોર્જે માત્ર 115 રનની ઈનિંગ રમીને જીતનો પાયો નાખ્યો હતો. વૈભવ સૂર્યવંશીએ 68 રન અને કેપ્ટન આયુષ મ્હાત્રેએ 62 રનનું યોગદાન આપીને ટીમને જીત તરફ દોરી હતી.

ઐતિહાસિક સિદ્ધિ
આ જીત સાથે ભારતે અંડર-19 વર્લ્ડ કપના ઈતિહાસનો સૌથી મોટો રન ચેઝ સફળતાપૂર્વક પૂર્ણ કર્યો છે. આ સાથે જ યુથ વનડે ક્રિકેટમાં પણ આ સૌથી મોટો ટાર્ગેટ ચેઝ બન્યો છે.

મેચમાં બન્યા અનેક નવા રેકોર્ડ્સ
આ સેમીફાઇનલ મેચ રનનો વરસાદ સાબિત થઈ હતી. મેચમાં બંને ટીમોના મળીને કુલ 620 રન બન્યા હતા. યુથ વનડેના ઈતિહાસમાં ભારત અને અફઘાનિસ્તાન વચ્ચે રમાયેલી કોઈપણ મેચમાં આ સૌથી મોટો સ્કોર છે. અગાઉનો રેકોર્ડ 521 રનનો હતો, જે વર્ષ 2021માં દુબઈમાં નોંધાયો હતો.