ભારત સરકારે ગઈગકાલે ચીનથી વધતી જતી સસ્તા સ્ટીલની આયાતને રોકવાના હેતુથી ત્રણ વર્ષ માટે પસંદગીના સ્ટીલ ઉત્પાદનો પર 11-12 ટકાની આયાત ડ્યુટી લાદવાનો નિર્ણય લીધો હતો. આ ડ્યુટી પહેલા વર્ષમાં 12 ટકા રહેશે, બીજા વર્ષે ઘટાડીને 11.5 ટકા અને ત્રીજા વર્ષે 11 ટકા કરવામાં આવશે.

વિશ્વનો બીજો સૌથી મોટો ક્રૂડ સ્ટીલ ઉત્પાદક ભારત, તાજેતરના મહિનાઓમાં ચીનથી ઓછી કિંમતના સ્ટીલની આયાતમાં અચાનક વધારાને કારણે સ્થાનિક સ્ટીલ ઉદ્યોગ પર વધતા દબાણ અને ગંભીર એન્ટિ-ડમ્પિંગ ચિંતાઓનો સામનો કરી રહ્યો છે. સરકારના સત્તાવાર ગેઝેટમાં પ્રકાશિત એક સૂચના અનુસાર, આ આયાત ડ્યુટી કેટલાક વિકાસશીલ દેશોના સ્ટીલ પર લાગુ થશે નહીં, પરંતુ તે ચીન, વિયેતનામ અને નેપાળને અસર કરશે. જો કે, સ્ટેનલેસ સ્ટીલ જેવા વિશિષ્ટ સ્ટીલ ઉત્પાદનોને આ ડ્યુટીના અવકાશમાંથી બાકાત રાખવામાં આવ્યા છે.

સ્ટીલ મંત્રાલય કહે છે કે તે સ્થાનિક સ્ટીલ ઉદ્યોગને સસ્તા અને નબળી ગુણવત્તાવાળી આયાતથી થતા નુકસાનથી બચાવવા માંગે છે. વેપાર નિદેશાલયે તપાસ બાદ શોધી કાઢ્યું કે આયાતમાં અચાનક અને નોંધપાત્ર વધારો થયો છે, જેનાથી સ્થાનિક ઉદ્યોગને ગંભીર નુકસાન થવાની ધમકી મળી છે. અગાઉ, એપ્રિલ 2025માં, ભારત સરકારે બધા દેશોમાંથી સ્ટીલની આયાત પર 200 દિવસ માટે 12 ટકાની કામચલાઉ ડ્યુટી લાદી હતી, જે નવેમ્બર 2025 માં સમાપ્ત થઈ ગઈ હતી. ભારતીય સ્ટેનલેસ સ્ટીલ ડેવલપમેન્ટ એસોસિએશને અગાઉ આ મુદ્દો ઉઠાવ્યો હતો. ઓગસ્ટ 2025 માં, સંગઠને સસ્તા સ્ટીલની આયાત પર એન્ટિ ડમ્પિંગ ડ્યુટીની માંગ કરતી ડીજીટીઆર સમક્ષ અરજી દાખલ કરી હતી.

ભારતનું પગલું એવા સમયે આવ્યું છે જ્યારે ચીની સ્ટીલ નિકાસ પર વૈશ્વિક વેપાર તણાવ વધી રહ્યો છે. યુએસ પ્રમુખ ડોનાલ્ડ ટ્રમ્પે સ્ટીલ આયાત પર ટેરિફ લાદ્યા પછી, ચીની સ્ટીલ અન્ય બજારોમાં પ્રવેશ્યું, જેના કારણે ઘણા દેશોએ તેમના વેપાર સુરક્ષા પગલાં કડક કર્યા. આ વર્ષે દક્ષિણ કોરિયા અને વિયેતનામે પણ ચીનથી આયાત થતા સ્ટીલ પર એન્ટિ-ડમ્પિંગ ડ્યુટી લાદી હતી.