સિંગાપોરમાં આયોજિત પ્રતિષ્ઠિત ફોર્મ્યુલા-વન (F1) ગ્રાન્ડ પ્રી ઇવેન્ટ દરમિયાન સુરક્ષામાં મોટી ચૂંકનો મામલો સામે આવ્યો છે, જેમાં એક ભારતીય નાગરિક વગર ટિકિટ એન્ટ્રી મેળવીને રેસિંગ વિસ્તારમાં ઘૂસી ગયો હતો. આ મામલે 39 વર્ષીય ભારતીય નાગરિક ડાવર અરીશ આદિલ સામે સત્તાવાર રીતે બે ગંભીર ગુનાહિત કેસ નોંધવામાં આવ્યા છે. સિંગાપોર પોલીસે આ મામલે કડક કાર્યવાહી હાથ ધરી છે અને આગામી દિવસોમાં કોર્ટમાં આ કેસની સુનાવણી હાથ ધરવામાં આવશે.

મળતી માહિતી મુજબ, આરોપી ડાવર અરીશ આદિલ 9 ઓક્ટોબરના રોજ બપોરે આશરે 1.45 વાગ્યે (સ્થાનિક સમય મુજબ) ટેમાસેક એવેન્યુ પર આવેલા ગેટ-2 ખાતે હાજર હતો અને ત્યાંથી તે ટિકિટ વગર જ સીધા રેસિંગના પ્રતિબંધિત એરિયામાં ઘૂસી ગયો હતો. આ ઘટના બાદ પણ તે અટક્યો નહોતો અને તે જ દિવસે બપોરે આશરે 2.00 વાગ્યે તેણે ફરીથી સુરક્ષા ઘેરો તોડ્યો હતો. તે રૅફલ્સ બૌલેવાર્ડમાં 'ધ વ્હાર્ફ' નામના એવા વિસ્તારમાં ઘૂસી ગયો હતો, જ્યાં માત્ર સિંગાપોર ગ્રાન્ડ પ્રીના અધિકૃત સ્ટાફ કે કર્મચારીઓને જ જવાની મંજૂરી હતી.

આ ગંભીર સુરક્ષા ઉલ્લંઘન બદલ તેની સામે 10 ઓક્ટોબરે સત્તાવાર આરોપો ઘડવામાં આવ્યા હતા. સિંગાપોરના કાયદા મુજબ, સાર્વજનિક સુરક્ષા અને પ્રતિબંધિત વિસ્તારોમાં ગેરકાયદે પ્રવેશ કરવાના આ બંને મામલાઓમાં જો તે દોષી સાબિત થાય છે, તો તેને કાયદાકીય જોગવાઈ મુજબ 3 મહિના સુધીની જેલની સજા અથવા ભારે દંડ, અથવા આ બંને સજા એકસાથે થઈ શકે છે. સિંગાપોર ગ્રાન્ડ પ્રી વીકેન્ડ દરમિયાન આંતરરાષ્ટ્રીય સ્તરની આ રેસ જોવા માટે દુનિયાભરમાંથી મોટી સંખ્યામાં પ્રવાસીઓ એકઠા થયા હતા, જેના કારણે સુરક્ષા વ્યવસ્થા અત્યંત સઘન રાખવામાં આવી હતી.

​​​​​​​આ ઘટનાથી ઇવેન્ટ મેનેજમેન્ટ અને સુરક્ષા એજન્સીઓની કામગીરી સામે પણ સવાલો ઉભા થયા છે. શુક્રવારે આ મામલે કોર્ટમાં સુનાવણી હાથ ધરવામાં આવશે, જ્યાં ન્યાયાધીશ દ્વારા આરોપી સામે આગળની કાનૂની કાર્યવાહી નક્કી કરવામાં આવશે. વિદેશી ધરતી પર બનેલી આ ઘટનાથી કાયદાકીય નિયમોનું પાલન કરવાનો સ્પષ્ટ સંદેશ મળે છે.