અમેરિકાના રાષ્ટ્રીય સુરક્ષા નિષ્ણાત અને ભારતીય મૂળના એશ્લે ટેલિસની અમેરિકાની ટોપ-સિક્રેટ ફાઇલ ચીનને આપવાના આરોપમાં એફબીઆઈએ ધરપકડ કરી છે. અમુક અત્યંત ગુપ્ત અને વર્ગીકૃત દસ્તાવેજો રાખવા અને ચીન સાથે સંબંધો રાખવાનો આરોપ તેમની સામે ઘડાયો છે.ફેડરલ બ્યુરો ઓફ ઇન્વેસ્ટિગેશનએ શનિવારે વર્જિનિયાના વિયેનામાં તેમના ઘરે દરોડો પાડ્યો હતો, જેમાં 1,000 થી વધુ પાનાના ટોપ-સિક્રેટ દસ્તાવેજો જપ્ત કરવામાં આવ્યા હતા

એફબીઆઈનો આરોપ છે કે ટેલિસ ગેરકાયદેસર રીતે યુએસ રાષ્ટ્રીય સુરક્ષા સંબંધિત ગુપ્ત સંરક્ષણ દસ્તાવેજો ધરાવે છે અને છેલ્લા કેટલાક વર્ષોમાં ચીની અધિકારીઓ સાથે ઘણી વખત મુલાકાત કરી હતી.એફબીઆઈ દ્વારા દાખલ કરાયેલા સોગંદનામા મુજબ, ટેલિસના ઘરના ભોંયરામાં આવેલી ઓફિસમાં બંધ કેબિનેટ, ડેસ્ક અને બેગમાં હજારો દસ્તાવેજો છુપાયેલા મળી આવ્યા હતા. આમાંથી ઘણા દસ્તાવેજો પર "ટોપ સિક્રેટ" અને "સિક્રેટ" સ્ટેમ્પ લગાવેલા હતા.

તપાસમાં એ પણ બહાર આવ્યું છે કે 25 સપ્ટેમ્બરના રોજ, ટેલિસ યુએસ સ્ટેટ ડિપાર્ટમેન્ટના કમ્પ્યુટર સિસ્ટમમાંથી સેંકડો ક્લાસિફાઇડ દસ્તાવેજો છાપતા કેમેરામાં કેદ થયા હતા. તેમણે ઇકોન રિફોર્મ નામથી યુએસ એર ફોર્સ ટેક્ટિક્સ નામની 1,288 પાનાની ફાઇલ સાચવી અને થોડા પાના છાપ્યા પછી ફાઇલ ડીલીટ કરી નાખી.

10 ઓક્ટોબરના રોજ, બીજા સુરક્ષા કેમેરાએ વર્જિનિયાના એલેક્ઝાન્ડ્રિયામાં એક સરકારી સુવિધામાં ટેલિસને તેની બેગમાં દસ્તાવેજો છુપાવતા કેદ કર્યા. એફબીઆઈના રિપોર્ટમાં જણાવાયું છે કે સપ્ટેમ્બર 2022 અને સપ્ટેમ્બર 2025 વચ્ચે, ટેલિસએ વર્જિનિયાના ફેરફેક્સ વિસ્તારમાં રેસ્ટોરન્ટમાં ચીની સરકારી અધિકારીઓ સાથે ઘણી ગુપ્ત બેઠકો કરી હતી. એક બેઠકમાં, તે એક મનીલા પરબિડીયું લઈને ગયો હતો, અને બહાર આવતી વખતે તે તેની પાસે ન હતું.

ટેલિસએ મુંબઈમાં અભ્યાસ કર્યો છે

આ બેઠકોમાં ઈરાન-ચીન સંબંધો, કૃત્રિમ બુદ્ધિમત્તા અને યુએસ-પાકિસ્તાન નીતિઓની ચર્ચા થઈ હતી. સપ્ટેમ્બર 2025ની બેઠક દરમિયાન, ટેલિસને ચીની અધિકારીઓ તરફથી લાલ ભેટ બેગ પણ મળી હતી. મુંબઈમાં જન્મેલા, 64 વર્ષીય એશ્લે ટેલિસને સેન્ટ ઝેવિયર્સ કોલેજ અને મુંબઈ યુનિવર્સિટીમાં અભ્યાસ કર્યો હતો અને શિકાગો યુનિવર્સિટીમાંથી રાજકીય વિજ્ઞાનમાં પીએચડીની ડિગ્રી મેળવી હતી. તેઓ યુએસ-ભારત નાગરિક પરમાણુ કરારના મુખ્ય વાટાઘાટકારોમાંના એક હતા. ટેલિસ અગાઉ યુએસ પ્રમુખ જ્યોર્જ ડબલ્યુ. બુશના ખાસ સહાયક અને રાષ્ટ્રીય સુરક્ષા પરિષ માં વ્યૂહાત્મક આયોજન અને દક્ષિણ એશિયાના નિયામક તરીકે સેવા આપી ચૂક્યા છે. હાલમાં તેઓ સંરક્ષણ વિભાગમાં કોન્ટ્રાક્ટર તરીકે કામ કરતા હતા અને કાર્નેગી એન્ડોમેન્ટ ફોર ઇન્ટરનેશનલ પીસમાં સિનિયર ફેલો હતા.

તક જોઈને એફબીઆઈ ત્રાટકી

ટેલિસ 11 ઓક્ટોબરની સાંજે તેમના પરિવાર સાથે રોમ જવાની તૈયારી કરી રહ્યા હતા, પરંતુ તેઓ ફ્લાઇટ પકડે તે પહેલાં તેમના ઘરે દરોડો પાડવામાં આવ્યો હતો અને તેમની ધરપકડ કરવામાં આવી હતી. તેમની પાસેથી મળેલા દસ્તાવેજોની તપાસ ચાલુ છે.તેમના પર વર્જિનિયા ડિસ્ટ્રિક્ટ કોર્ટમાં ઔપચારિક રીતે આરોપ મૂકવામાં આવ્યો હતો. ટેલિસ હાલમાં રાષ્ટ્રીય સુરક્ષા કાયદાનું ઉલ્લંઘન કરવા, વર્ગીકૃત દસ્તાવેજો ચોરી કરવા અને વિદેશી સંપર્કોની જાણ કરવામાં નિષ્ફળ રહેવા બદલ કેસનો સામનો કરી રહ્યા છે.