ભારતના મોટાભાગના રાજ્યોમાં હાલમાં ચામડી દઝાડતી અને મોં ઝુલસાવી દેતી ભીષણ ગરમી પડી રહી છે. આકાશમાંથી વરસી રહેલી આકરી આંચ અને કાતિલ લૂ (Heat Wave) ના કારણે સામાન્ય જનજીવન અસ્તવ્યસ્ત થઈ ગયું છે. લોકો એવી ગરમીનો અનુભવ કરી રહ્યા છે જાણે કોઈ આગના ગોળાની નજીક ઊભા હોય!

હવામાન વિભાગ (IMD) ના સત્તાવાર રિપોર્ટ અનુસાર દેશના અનેક ભાગોમાં પારો ૪૫ થી ૪૭ ડિગ્રી સેલ્સિયસને પાર પહોંચી ગયો છે. હવામાન વિભાગે આગામી ૩ થી ૪ દિવસ સુધી મધ્ય ભારત અને ઉત્તર-પશ્ચિમ ભારતના વિસ્તારોમાં આવી જ ગંભીર સ્થિતિ યથાવત રહેવાની આશંકા સાથે રેડ એલર્ટ (Red Alert) જાહેર કર્યું છે. હવામાન વિભાગે ગુરુવારે (૨૮ મે) ચેતવણી આપતા જણાવ્યું છે કે પૂર્વ મધ્ય પ્રદેશ, રાજસ્થાન અને વિદર્ભમાં આગામી કેટલાક દિવસો સુધી અતિ ગંભીર લૂ (Severe Heat Wave) ચાલુ રહેશે.

કયા વિસ્તારોમાં ગરમીનું ‘રેડ એલર્ટ’?
ભયાનક ગરમી અને લૂના કારણે હવામાન વિભાગે પંજાબ, હરિયાણા, ચંદીગઢ, દિલ્હી, પશ્ચિમ ઉત્તર પ્રદેશ, પશ્ચિમ મધ્ય પ્રદેશ અને છત્તીસગઢના અનેક વિસ્તારો માટે રેડ એલર્ટ જાહેર કર્યું છે. આ ઉપરાંત ગુજરાત, કોંકણ, ગોવા, તમિલનાડુ, પુડુચેરી અને આંધ્રપ્રદેશના દરિયાકાંઠાના વિસ્તારોમાં હવામાન અત્યંત ગરમ અને અસહ્ય ઉમસ (ભેજવાળું) રહેવાની સંભાવના છે. વિદર્ભ સહિતના કેટલાક વિસ્તારોમાં તો રાત્રિના સમયે પણ તાપમાન ઊંચું રહેવાના કારણે 'વાર્મ નાઈટ' (Warm Night - ગરમ રાત) ની સ્થિતિ બનેલી છે.

રાજસ્થાનનું શ્રીગંગાનગર ૪૮.૨ ડિગ્રી સાથે દેશમાં સૌથી ગરમ
ઉત્તર પ્રદેશ અને રાજસ્થાનના મોટાભાગના જિલ્લાઓમાં તાપમાન ૪૩ થી ૪૭ ડિગ્રી સેલ્સિયસની વચ્ચે નોંધાઈ રહ્યું છે. ગુરુવારે દેશનું સૌથી વધુ તાપમાન રાજસ્થાનના શ્રીગંગાનગરમાં ૪૮.૨ ડિગ્રી સેલ્સિયસ નોંધાયું હતું, જે આ સીઝનનો રેકોર્ડ છે. જમ્મુ-કાશ્મીર, લદ્દાખ અને હિમાચલ પ્રદેશ જેવા પહાડી રાજ્યોમાં પણ તાપમાન સામાન્ય કરતાં ઘણું વધારે નોંધાયું છે. ૩૧ મે સુધી ઓડિશા અને પશ્ચિમ રાજસ્થાનના વિસ્તારોમાં પણ સૂર્યદેવનો પ્રકોપ ચાલુ રહેશે.

ભીષણ ગરમી વચ્ચે આ વિસ્તારોમાં વરસાદની મોટી આગાહી
આ કાળઝાળ ગરમી વચ્ચે દેશના કેટલાક રાજ્યોના નાગરિકો માટે રાહતના સમાચાર પણ સામે આવ્યા છે. હવામાન વિભાગે દિલ્હી, ઉત્તર પ્રદેશ, ઝારખંડ અને રાજસ્થાન સહિતના કેટલાક ભાગોમાં તેજ પવન અને વાવાઝોડા સાથે વરસાદનું એલર્ટ (Rain Alert) જાહેર કર્યું છે:

દક્ષિણ ભારત: ૨૮ મે થી ૧ જૂન દરમિયાન તમિલનાડુ, કેરળ, લક્ષદ્વીપ અને તેલંગાણામાં ૪૦ થી ૫૦ કિલોમીટર પ્રતિ કલાકની ઝડપે પવન ફૂંકાશે અને હળવોથી મધ્યમ વરસાદ પડવાની શક્યતા છે.
​​​​​​​

ધૂળની ડમરીઓ અને આંધી: હરિયાણા, પંજાબ, ઉત્તર પ્રદેશ, હિમાચલ પ્રદેશ, ઉત્તરાખંડ અને રાજસ્થાનમાં વરસાદની સાથે ૭૦ કિલોમીટર પ્રતિ કલાકની પ્રચંડ ઝડપે આંધી-વાવાઝોડું આવવાની પણ આશંકા છે.

આ પ્રી-મોન્સૂન વરસાદી ગતિવિધિઓ શરૂ થવાના કારણે આગામી દિવસોમાં લોકોને આ આકરી અને ઝુલસાવી દેતી ગરમીમાંથી મોટી રાહત મળવાની આશા સેવાઈ રહી છે.