નેશનલ સ્ટોક એક્સચેન્જ (NSE) આગામી 16 માર્ચથી કોમોડિટી માર્કેટમાં એક મોટી ક્રાંતિ લાવવા જઈ રહ્યું છે. સેબી (SEBI) ની મંજૂરી બાદ, હવે નાના રોકાણકારો માટે સોનામાં ટ્રેડિંગ કરવું અત્યંત સરળ બનશે. NSE તેના કોમોડિટી ડેરિવેટિવ્ઝ સેગમેન્ટમાં ‘ગોલ્ડ 10 ગ્રામ ફ્યુચર્સ’ (Gold 10 Gram Futures) કોન્ટ્રાક્ટ લોન્ચ કરી રહ્યું છે, જેનો મુખ્ય હેતુ મધ્યમ વર્ગના રોકાણકારોને સોનાના ભાવમાં થતા ઉતાર-ચઢાવનો સીધો લાભ આપવાનો છે.

'GOLD10G' ના નામે થશે ટ્રેડિંગ
રોકાણકારો આ સુવિધાનો લાભ 'GOLD10G' સિમ્બોલ હેઠળ લઈ શકશે. આ કોન્ટ્રાક્ટની કેટલીક મહત્વની લાક્ષણિકતાઓ નીચે મુજબ છે:

ટ્રેડિંગનો સમય: સોમવારથી શુક્રવાર દરમિયાન સવારે 9:00 વાગ્યાથી રાત્રે 11:30 વાગ્યા સુધી ટ્રેડિંગ કરી શકાશે. (અમેરિકન ડે-લાઇટ સેવિંગના સમયે આ સમય રાત્રે 11:55 સુધી લંબાઈ શકે છે).

માસિક એક્સપાયરી: આ કોન્ટ્રાક્ટ દર મહિનાની સીરીઝમાં ઉપલબ્ધ હશે અને મહિનાના છેલ્લા કેલેન્ડર દિવસે તેની એક્સપાયરી ગણાશે.

મર્યાદા: એક ઓર્ડર હેઠળ મહત્તમ 10 કિલો સોનાની લે-વેચ કરી શકાશે, જ્યારે વ્યક્તિગત રોકાણકાર માટે પોઝિશન લિમિટ 5 મેટ્રિક ટન રાખવામાં આવી છે.

ડિલિવરીના કડક અને પારદર્શક નિયમો
આ કોન્ટ્રાક્ટની સૌથી મોટી ખાસિયત એ છે કે તેમાં સોનાની ફિઝિકલ ડિલિવરી લેવી ફરજિયાત રહેશે. રોકાણકારોને 999 શુદ્ધતા વાળું 10 ગ્રામ સોનું મળશે, જેની સાથે ક્વોલિટી સર્ટિફિકેટ પણ આપવામાં આવશે. સોનાની ડિલિવરી અમદાવાદ સેન્ટર પર કરવામાં આવશે અને તેના ભાવ પણ અમદાવાદના સ્પોટ ગોલ્ડ પ્રાઈસના આધારે નક્કી થશે. નક્કી કરેલા ભાવમાં કસ્ટમ ડ્યુટી સામેલ હશે, પરંતુ જીએસટી (GST) ની ચુકવણી અલગથી કરવાની રહેશે.

રોકાણકારોની સુરક્ષા માટે 'રિસ્ક મેનેજમેન્ટ'
બજારમાં અચાનક આવતા મોટા ઉતાર-ચઢાવથી રોકાણકારોને બચાવવા માટે NSE એ ખાસ સુરક્ષા ચક્ર તૈયાર કર્યું છે. દૈનિક ભાવ વધારા કે ઘટાડાની મર્યાદા (Daily Price Limit) 6 ટકા નક્કી કરવામાં આવી છે. જો બજાર વધુ અસ્થિર હોય, તો 15 મિનિટના બ્રેક (Cooling-off period) બાદ આ મર્યાદાને વધારીને 9 ટકા સુધી લઈ જઈ શકાય છે.

​​​​​​​નિષ્ણાતો માને છે કે આ સુવિધાથી સોનામાં રોકાણ કરવાની પદ્ધતિમાં મોટો ફેરફાર આવશે. હવે રોકાણકારોએ માત્ર જ્વેલર્સ પર નિર્ભર રહેવાની જરૂર નથી, તેઓ એક્સચેન્જ દ્વારા પારદર્શક રીતે અને વિશ્વાસપાત્ર શુદ્ધતા સાથે સોનું ખરીદી શકશે. હવે સોનું માત્ર તિજોરીમાં જ નહીં, તમારા ડિજિટલ પોર્ટફોલિયોમાં પણ ચમકશે!