હોર્મુઝની ખાડીમાં અનધિકૃત માર્ગેથી બહાર નીકળવાનો પ્રયાસ કરી રહેલા એક સુપરટેન્કર સાથે દરિયાઈ સુરંગો અથડાતાં ભયાનક વિસ્ફોટ થયો છે. ઈરાનની ઇસ્લામિક રેવોલ્યુશન ગાર્ડ કોર્પ્સ (IRGC) ની નૌકાદળે શનિવારે આ માહિતી આપી હતી. IRGC ના સત્તાવાર સમાચાર આઉટલેટ 'સેપાહ ન્યૂઝ' પર પ્રકાશિત એક નિવેદનમાં નૌકાદળે જણાવ્યું હતું કે કાચું તેલ લઈને જતું આ જહાજ, તેની નેવિગેશન અને જીપીએસ સિસ્ટમ બંધ કરીને આગળ વધી રહ્યું હતું અને વિસ્ફોટ બાદ તેમાં ભીષણ આગ લાગી ગઈ હતી.

નૌકાદળે ચેતવણી આપી છે કે આ માર્ગને અતિ જોખમી જાહેર કરવામાં આવ્યો છે અને ઈરાનના નિયમોની અવગણના કરવાનો પ્રયાસ કરનાર કોઈપણ ઓઈલ ટેન્કરનું આ જ પ્રકારનું પરિણામ આવશે. અગાઉ શુક્રવારે IRGC નૌકાદળે જણાવ્યું હતું કે તેના દળોએ હોર્મુઝની ખાડીની દક્ષિણે આવેલા ગેરકાયદેસર માર્ગમાંથી પસાર થવાના પ્રયાસમાં રહેલા 'એનવી સનશાઇન' નામના એક વિશાળ લિક્વિફાઇડ પેટ્રોલિયમ ગેસ કેરિયરને નિશાન બનાવ્યું હતું. આ હુમલાને કારણે જહાજનો એન્જિન રૂમ અને પ્રોપલ્શન સિસ્ટમ આગની ચપેટમાં આવી ગયા હતા.

નૌકાદળના જણાવ્યા અનુસાર, આ પ્રકારની ઘટનાઓ અને આ ક્ષેત્રમાં વધી રહેલા દરિયાઈ તણાવ માટે યુએસ સૈન્ય જવાબદાર છે. તેણે એ પણ ચેતવણી આપી છે કે નિયમોનું ઉલ્લંઘન કરતા જહાજો સામેની કાર્યવાહી હવે માત્ર હોર્મુઝની ખાડી પૂરતી મર્યાદિત નહીં રહે, પરંતુ અનધિકૃત માર્ગો પાર કરનાર કોઈપણ જહાજને સજા કરવામાં આવશે.

​​​​​​​ઈરાન અને યુનાઇટેડ સ્ટેટ્સ દ્વારા ઈરાની ટેરિટરી પર કરવામાં આવેલા સંયુક્ત હુમલાઓને પગલે ઈરાને ઇઝરાયેલ અને યુનાઇટેડ સ્ટેટ્સ સાથે સંબંધિત જહાજોની સુરક્ષિત અવરજવર પર પ્રતિબંધ મૂક્યો છે અને ૨૮ ફેબ્રુઆરીથી હોર્મુઝની ખાડી પર પોતાની પકડ વધુ મજબૂત બનાવી દીધી છે.