શનિવારે દુબઈમાં એક પછી એક અનેક ધડાકા સંભળાયા બાદ સોશિયલ મીડિયા પર દહેશતનો માહોલ જોવા મળ્યો હતો. ખાસ કરીને પામ જુમેરાહ આઈલેન્ડ પર આવેલી પ્રસિદ્ધ 'ફેરમોન્ટ ધ પામ' (Fairmont The Palm) હોટલ પાસે લાગેલી આગ અને ધુમાડાના વીડિયો વાયરલ થતા પ્રશ્ન ઊભો થયો છે કે શું ઈરાને સીધો દુબઈના આ આલીશાન વિસ્તારને નિશાન બનાવ્યો છે?

વાયરલ વીડિયોમાં શું દેખાયું?
સોશિયલ મીડિયા પર શેર કરાયેલા વીડિયોમાં હોટલની બિલ્ડિંગની એકદમ નજીક આગની જ્વાળાઓ અને કાળા ધુમાડાના ગોટા ઉડતા દેખાય છે. મધ્ય પૂર્વમાં અમેરિકી ઠેકાણાઓ પર ઈરાનના હુમલાના સમાચાર વચ્ચે આ વીડિયોએ દુનિયાભરમાં ચિંતા જગાવી છે.

હુમલો કે મિસાઈલના અવશેષો?
હાલમાં આ ઘટના અંગે બે પ્રકારની શક્યતાઓ સેવાઈ રહી છે:

સીધો પ્રહાર: શું ઈરાની મિસાઈલે સીધો જ હોટલ અથવા તેની આસપાસના વિસ્તારને ટાર્ગેટ કર્યો છે?

ઈન્ટરસેપ્શન (Interception): વધુ પ્રબળ શક્યતા એ છે કે UAE ની એર ડિફેન્સ સિસ્ટમે ઈરાની મિસાઈલને હવામાં જ તોડી પાડી હોય અને તેના સળગતા અવશેષો (Debris) હોટલ નજીક પડ્યા હોય, જેના કારણે ત્યાં આગ લાગી છે.

સત્તાવાર પુષ્ટિની રાહ
અત્યાર સુધી UAE સત્તાવાળાઓ કે ફેરમોન્ટ ધ પામ હોટલ મેનેજમેન્ટ દ્વારા કોઈ સત્તાવાર પુષ્ટિ કરવામાં આવી નથી. હોટલની ઇમારતને કેટલું નુકસાન થયું છે કે કોઈ જાનહાનિ થઈ છે કે કેમ, તે અંગે હજુ સુધી કોઈ સ્પષ્ટ માહિતી નથી. જોકે, આ ઘટનાને પગલે સમગ્ર ક્ષેત્રનું એરસ્પેસ બંધ કરી દેવામાં આવ્યું છે અને ફ્લાઈટ્સ રદ કરવામાં આવી છે.

યુદ્ધના પડઘમ અને જિનીવા મંત્રણાની નિષ્ફળતા
આ હુમલો એવા સમયે થયો છે જ્યારે અમેરિકા અને ઈઝરાયેલે ઈરાન પર વળતા હુમલા શરૂ કરી દીધા છે.

ડિપ્લોમસીનો અંત
જિનીવામાં એક સપ્તાહ સુધી ચાલેલી મંત્રણા નિષ્ફળ ગયા બાદ પરિસ્થિતિ વણસી છે. અનેક દેશોએ પોતાના નાગરિકોને ઈરાન, ઈઝરાયેલ અને આસપાસના વિસ્તારો તાત્કાલિક છોડી દેવા સૂચના આપી છે.