મધ્ય પૂર્વમાં વધતા તણાવ વચ્ચે હોર્મુઝની સામુદ્રધુની (Strait of Hormuz) ને લઈને એક નવો વિવાદ શરૂ થયો છે. ઈરાનની સંસદના ડેપ્યુટી સ્પીકર અલી નિકઝાદના જણાવ્યા અનુસાર ઈરાને હોર્મુઝની સામુદ્રધુનીમાંથી પસાર થતા જહાજોના નિયમન માટે એક નવી યોજના તૈયાર કરી છે. આ યોજના હેઠળ ઈઝરાયેલી જહાજોના પ્રવેશ પર કાયમી પ્રતિબંધ મૂકવામાં આવ્યો છે, જ્યારે અન્ય દેશોના જહાજો માટે પરવાનગી અને ફી ચૂકવવી ફરજિયાત બનાવવામાં આવી છે.

યોજનાની મુખ્ય જોગવાઈઓ
આ યોજનામાં ૧૨ મુખ્ય પગલાંનો સમાવેશ કરવામાં આવ્યો છે, જેમાં ઈઝરાયેલી જહાજો પર સંપૂર્ણ પ્રતિબંધ છે અને 'પ્રતિકૂળ દેશો' (જેમ કે અમેરિકા) એ યુદ્ધ વળતર ચૂકવવું પડશે. અન્ય તમામ જહાજોએ આ વિસ્તારમાંથી પસાર થવા માટે ઈરાન પાસેથી પૂર્વ મંજૂરી લેવી પડશે અને સુરક્ષા, પર્યાવરણ તેમજ પરમિટ સંબંધિત ફી ચૂકવવી પડશે. આ ફી ઈરાનના ચલણ 'રિયાલ' માં ચૂકવવાની રહેશે. ઈરાનનું કહેવું છે કે આ જળમાર્ગ પર સંપૂર્ણ સાર્વભૌમત્વ ઈરાનનું છે.

​​​​​​​અમેરિકાની કડક ચેતવણી
અમેરિકાના ડિપાર્ટમેન્ટ ઓફ ટ્રેઝરી અને ઓફિસ ઓફ ફોરેન એસેટ્સ કંટ્રોલ (OFAC) એ શિપિંગ કંપનીઓ માટે કડક ચેતવણી જાહેર કરી છે. જો કોઈ પણ અમેરિકન કે વિદેશી કંપની ઈરાનને આ પ્રકારની ફી કે ટેક્સ ચૂકવશે, તો તેને અમેરિકાના આર્થિક પ્રતિબંધોનો સામનો કરવો પડશે. યુએસ ડિપાર્ટમેન્ટ ઓફ ડિફેન્સ (પેન્ટાગોન) ના જણાવ્યા અનુસાર અમેરિકાની નાકાબંધીના કારણે ઈરાનને તેલની આવકમાં આશરે ૪.૮ અબજ ડોલરનું નુકસાન થયું છે અને અમેરિકા આ ક્ષેત્રમાં સતત દબાણ જાળવી રાખશે.