ઇઝરાયલી વડા પ્રધાન બેન્જામિન નેતન્યાહૂએ દાવો કર્યો છે કે તેમના દેશે વિશ્વનું સૌથી અદ્યતન અને ખતરનાક હથિયાર વિકસાવ્યું છે, જે યુનાઇટેડ સ્ટેટ્સને આપવામાં આવ્યું છે. કોઈ પણ મહાસત્તા પાસે ન હોય તેવા અદ્યતન શસ્ત્રો વિકસાવી અમે અમેરિકાને આપીએ છીએ તેવી નેતન્યાહૂની જાહેરાતથી વિશ્વમાં ખળભળાટ મચી જવા પામ્યો છે. જો કે, નેતન્યાહૂના નિવેદનમાં એવી કોઈ સ્પષ્ટતા કરવામાં આવી નથી કે આ નવું શસ્ત્ર સંરક્ષણ પ્રણાલી છે, સાયબર હથિયાર છે કે પરમાણુ ટેકનોલોજી સાથે સંબંધિત છે.

અમેરિકન પત્રકાર બેન શાપિરો સાથેની મુલાકાતમાં, નેતન્યાહૂએ જણાવ્યું હતું કે ઇઝરાયલ અમેરિકાને એવા શસ્ત્રો પૂરા પાડે છે જે અન્ય કોઈ મહાસત્તા પાસે નથી. અમે એવી ટેકનોલોજી વિકસાવી છે જે ફક્ત અમારી પાસે છે, અને અમે તેને યુનાઇટેડ સ્ટેટ્સ સાથે શેર કરીએ છીએ.જો કે બેન્જામિન નેતન્યાહૂએ જાહેર કર્યું ન હતું કે તેઓ કયા હથિયાર અથવા સંરક્ષણ ટેકનોલોજીનો ઉલ્લેખ કરી રહ્યા હતા, પરંતુ તેમના નિવેદનથી વૈશ્વિક સંરક્ષણ નિષ્ણાતોમાં ચર્ચા શરૂ થઈ છે. ઇન્ટરવ્યૂમાં, નેતન્યાહૂએ ઇરાનની વધતી જતી પરમાણુ ક્ષમતાઓ પર ચિંતા વ્યક્ત કરી હતી. તેમણે દાવો કર્યો હતો કે ઇરાન હવે ઇન્ટરકોન્ટિનેન્ટલ બેલિસ્ટિક મિસાઇલો વિકસાવી રહ્યું છે જે ન્યુ યોર્ક, વોશિંગ્ટન, બોસ્ટન અને મિયામી જેવા અમેરિકન શહેરોને નિશાન બનાવી શકે છે. નેતન્યાહૂએ કહ્યું, "ઈરાને હવે 8,000 કિલોમીટરની રેન્જવાળી મિસાઇલો વિકસાવી છે. જો તેઓ બીજા 3,000 કિલોમીટર ઉમેરે છે, તો તેઓ યુનાઇટેડ સ્ટેટ્સના પૂર્વ કિનારા સુધી પહોંચી શકે છે. આ એક વાસ્તવિક ખતરો છે." તેમણે ઉમેર્યું હતું કે ઇરાનની આ ક્ષમતા માત્ર મધ્ય પૂર્વ માટે જ નહીં પરંતુ અમેરિકાની રાષ્ટ્રીય સુરક્ષા માટે પણ પડકાર ઉભો કરી શકે છે.

ઇરાન હવે કોઈપણ અમેરિકન શહેરને બ્લેકમેલ કરી શકે

બેન્જામિન નેતન્યાહૂના મતે, ઇરાન હવે કોઈપણ અમેરિકન શહેરને બ્લેકમેલ કરી શકે છે. ઇઝરાયલ અને યુનાઇટેડ સ્ટેટ્સ વચ્ચે સંરક્ષણ સહયોગ પહેલા કરતાં વધુ મજબૂત બન્યો છે. બંને દેશો હવે સંયુક્ત રીતે આક્રમક અને વ્યૂહાત્મક શસ્ત્રો વિકસાવી રહ્યા છે જે અન્ય કોઈ મહાસત્તા પાસે નથી. આ ભાગીદારી ફક્ત સુરક્ષા માટે નથી, પરંતુ ભવિષ્યની સંરક્ષણ ટેકનોલોજીને આકાર આપવા માટે છે.

ઈરાન-ઇઝરાયલ તણાવ ફરી વધ્યો

નેતન્યાહૂનું નિવેદન એવા સમયે આવ્યું છે જ્યારે ઈરાન અને ઇઝરાયલ વચ્ચે તણાવ પહેલાથી જ ચરમસીમાએ છે. તેહરાને તાજેતરમાં એક નવા પ્રકારની હાઇપરસોનિક મિસાઇલનું સફળતાપૂર્વક પરીક્ષણ કરવાનો દાવો કર્યો છે, જે કોઈપણ સંરક્ષણ પ્રણાલીથી બચવા માટે સક્ષમ હોવાનું કહેવાય છે. ઇઝરાયલ માને છે કે ઈરાનની આ નીતિ પ્રાદેશિક સ્થિરતા અને પરમાણુ અપ્રસાર સંધિ માટે ગંભીર ખતરો છે. નેતન્યાહૂ વારંવાર કહી ચૂક્યા છે કે જો ઈરાન પરમાણુ શસ્ત્રો મેળવી લેશે, તો મધ્ય પૂર્વનો કોઈ પણ દેશ સુરક્ષિત રહેશે નહીં.

અમેરિકાને અપાયેલા હથિયારો એઆઈ પર આધારિત હોઈ શકે

સંરક્ષણ વિશ્લેષકોના મતે, નેતન્યાહૂ જે "અત્યાધુનિક હથિયાર"નો ઉલ્લેખ કરી રહ્યા છે તે કૃત્રિમ બુદ્ધિ અને ડ્રોન નેટવર્ક પર આધારિત હોઈ શકે છે. ઇઝરાયલ તેની આયર્ન બીમ લેસર સંરક્ષણ પ્રણાલી અને એઆઈ-સક્ષમ મિસાઇલ સંરક્ષણ માટે પહેલાથી જ સમાચારમાં છે. અમેરિકા અને ઇઝરાયલ પાસે પહેલાથી જ સંયુક્ત પ્રોજેક્ટ ચાલી રહ્યા છે, જેમ કે આયર્ન ડોમ અને ડેવિડ સ્લિંગ, જે હવે આગામી સ્તરની ટેકનોલોજીમાં વિકસાવવામાં આવી રહ્યા છે.