લેબનાનની વ્યૂહાત્મક રીતે મહત્વની ગણાતી બેકા ઘાટી (Beqaa Valley) માં શુક્રવારે ઈઝરાયેલી વાયુસેનાએ કરેલા હુમલામાં ભારે જાનહાનિ થઈ છે. આ હુમલામાં 12 લોકોના મોત થયા છે અને 50થી વધુ લોકો ઈજાગ્રસ્ત થયા હોવાના અહેવાલ છે. સૌથી નોંધપાત્ર બાબત એ છે કે માર્યા ગયેલા લોકોમાં હિઝબુલ્લાહનો એક હાઈ-પ્રોફાઈલ સિનિયર કમાન્ડર પણ સામેલ છે.

હિઝબુલ્લાહના કમાન્ડ સેન્ટર પર નિશાન
ઈઝરાયેલી સૈન્યના જણાવ્યા અનુસાર, તેમણે પૂર્વી લેબનાનમાં કાર્યરત હિઝબુલ્લાહના મુખ્ય કમાન્ડ સેન્ટરને સચોટ નિશાન બનાવ્યું હતું. છેલ્લા કેટલાક અઠવાડિયામાં આ વિસ્તારમાં થયેલો આ સૌથી ઘાતક હુમલો માનવામાં આવે છે. આ હુમલા બાદ ઈઝરાયેલ અને હિઝબુલ્લાહ વચ્ચે થયેલા નાજુક યુદ્ધવિરામ પર ખતરો મંડરાઈ રહ્યો છે, કારણ કે બંને પક્ષો વારંવાર એકબીજા પર યુદ્ધવિરામના ભંગનો આરોપ લગાવી રહ્યા છે.

શરણાર્થી શિબિરમાં હમાસના ઠેકાણા પર હુમલો
બેકા ઘાટી સિવાય, ઈઝરાયેલે બંદર શહેર સિડોનમાં આવેલા ઐન અલ-હિલવે (Ain al-Hilweh) નામના પેલેસ્ટિનિયન શરણાર્થી શિબિરને પણ નિશાન બનાવ્યું હતું. આ હુમલામાં ૨ લોકોના મોત થયા છે. ઈઝરાયેલનો દાવો છે કે આ શિબિરમાં હમાસનું કમાન્ડ સેન્ટર કાર્યરત હતું. જોકે હમાસે તેના બે સભ્યોના મોતની પુષ્ટિ કરી છે, પરંતુ કમાન્ડ સેન્ટર હોવાની વાતને 'નબળું બહાનું' ગણાવીને ફગાવી દીધી છે.

વધતું જતું તણાવ અને માનવીય સંકટ
આ તાજા હુમલાઓથી લેબનાનમાં ફરી એકવાર ભય અને અફરાતફરીનો માહોલ સર્જાયો છે. આંતરરાષ્ટ્રીય નિરીક્ષકોનું માનવું છે કે જો હુમલાઓ આ જ રીતે ચાલુ રહેશે, તો માંડ-માંડ સ્થાપિત થયેલી શાંતિ ડગમગી જશે અને સમગ્ર પ્રદેશ ફરીથી મોટા પાયાના યુદ્ધની લપેટમાં આવી શકે છે.