કારણ કે, આ માર્ગ પર ૬૩ દિગ્વિજય પ્લોટ પાસે છેલ્લાં છ મહીના જેટલા સમયથી માર્ગની એક બાજુ ભૂગર્ભ ગટરનું કામ ચાલી રહ્યું છે. જે હજુ સુધી પૂર્ણ થયું નથી. આ કામગીરીથી એક બાજુનો માર્ગ બંધ છે. આથી ટ્રાફીકની પારવાર સમસ્યા સર્જાઇ રહી છે. આ કામગીરી અત્યંત ધીમી ગતિએ થઇ રહી છે. ત્યારે મનપામાં કોઇ કહેવાવાળું કે પૂછવાવાળું છે કે કેમ કે પછી મનપાના જવાબદારો શહેરીજનોને ભલેને મુશ્કેલી પડી અમારે શું તેમાં નીતીરીતી અપનાવી છે તે સવાલ લોકોમાં ઉઠ્યો છે. આટલું ઓછું હોય તેમ સુમેરકલબ પાસે માર્ગમાં એક બાજુ ભૂગર્ભ ગટરની કામગીરીના કારણે મસમોટા ખાડા કર્યા હોય એક બાજુનો માર્ગ બંધ છે. આથી ટ્રાફીકની સમસ્યાએ માઝા મૂકી છે.

​​​​​​​

 નવાઇની વાત તો એ છે કે, આ માર્ગ પર હોસ્પિટલો આવેલી હોય મોટી સંખ્યામાં દર્દીઓ આવાગમન કરતા હોય છે. ખાસ કરીને ઇમરજન્સીના કીસ્સાઓમાં એમ્યુલન્સને આવાગમનમાં આ કારણોસર ભારે અવરોધ થઇ રહ્યો છે. આ તમામ સમસ્યાથી શહેરીજનો રીતસર થાકી ગયા છે. ૪૯-દિગ્વિજય પ્લોટ પાસે પણ કામગીરી માટે મસમોટો ખાડો કર્યો હતો. જે એક દીવસ પહેલા જ બુરવામાં આવ્યો છે. આમ ટ્રાફીકથી ધમધમતા આ માર્ગ પર ભૂગર્ભ ગટરની કામગીરી કાચબાથી પણ ધીમી ગતિએ ચાલી રહી હોય ટ્રાફીક સહીતની સમસ્યાએ માઝા મૂકતા શહેરીજનોને નાકે દમ આવી ગયો છે. પરંતુ મનપાના જવાબદારોને કંઇ ફેર ન પડતો હોય તેમ પોતાનામાં વ્યસ્ત રહેતા આ તે કેવો વિકાસ તે સળગતો સવાલ ઉઠ્યો છે.


પાછલા બારણેથી ખર્ચ વધારવા ઇરાદાપૂર્વક કામમાં વિલંબ, તપાસનો વિષય..!


જામનગર મહાનગરપાલીકા દ્વારા શહેરમાં મોટાભાગના નાના કે મોટા વિકાસકાર્યો જે સમયમર્યાદામાં પૂરા થતા નથી તે એક નરી વાસ્તવીકતા છે. મોટા ભાગના કામ સમયસર પૂરા ન થતાં ખર્ચમાં દીન-પ્રતિદિન વધારો થતો રહે છે. અમુક કામમાં તો આ વધારો કરોડો રૂપિયાનો હોય છે. ત્યારે પાછલા બારણેથી ખર્ચ વધારવા ભૂગર્ભ ગટરના કામમાં ઇરાદાપૂર્વક વિલંબ કરવામાં આવી રહ્યો છે અને તેની પાછળ કોના મલીન ઇરાદા કારણભૂત છે તે વીજીલન્સ તપાસનો વિષય બન્યો છે. કારણ કે, મનપાના જવાબદારો દ્રારા તો કોઇ પણ કામમાં વિલંબ થાય હોતી હે ચલતી હે ની નીતિ અખત્યાર કરવામાં આવી રહી છે. ​​​​​​​