આરસીબીની જીતની ઉજવણી દરમિયાન બેંગલુરુમાં થયેલી ભાગદોડમાં 11 ચાહકોના મોત થયા હતા. આ સમગ્ર મામલામાં આરસીબી (રોયલ ચેલેન્જર્સ બેંગ્લોર), બીસીસીઆઈ (ભારતીય ક્રિકેટ બોર્ડ) અને કર્ણાટક સરકારે પોતાના હાથ ખંખેરી લીધા હતા. પરંતુ હવે કર્ણાટક હાઈકોર્ટે આ મામલે કાર્યવાહી કરી છે. કોર્ટે આ દુ:ખદ ઘટનાની સુઓમોટો નોંધ લીધી છે જેની આજે સુનાવણી થઈ હતી.

આ મામલો કાર્યકારી મુખ્ય ન્યાયાધીશ વી. કામેશ્વર રાવ અને ન્યાયાધીશ સીએમ જોશીની બેન્ચ સમક્ષ ઉઠાવવામાં આવ્યો છે.

બેન્ચે પૂછ્યું કે સ્ટેડિયમમાં કેટલા દરવાજા છે, ત્યારે રાજ્યએ જણાવ્યું કે કુલ 21 દરવાજા છે, જે બધા ખુલ્લા હતા અને લોકો અંદર બેઠા હતા. ભીડ નિયંત્રણ માટે સ્ટાન્ડર્ડ ઓપરેટિંગ પ્રોસિજર (SOP) અંગે કોર્ટના પ્રશ્નના જવાબમાં, કર્ણાટક સરકારે કહ્યું કે ભવિષ્યમાં આવી ઘટનાઓ અટકાવવા માટે એક નવી SOP તૈયાર કરવાનું કામ ચાલી રહ્યું છે. શેટ્ટીએ કહ્યું કે મુખ્યમંત્રી સિદ્ધારમૈયાએ અધિકારીઓને એક નવી SOP તૈયાર કરવાનો નિર્દેશ આપ્યો હતો અને ઘટનાની રાતથી જ તેના પર કામ શરૂ થઈ ગયું છે. 

રાજ્ય સરકારે કોર્ટને એમ પણ કહ્યું કે RCB અને તેના ઇવેન્ટ મેનેજર ટિકિટિંગ અને ભીડ વ્યવસ્થાપન સંભાળતા હતા. શેટ્ટીએ કહ્યું કે FIR નોંધવામાં આવી છે અને સંબંધિત પક્ષોને કોઈ બેદરકારી હતી કે કેમ તેની તપાસ કરવા માટે નોટિસ જારી કરવામાં આવી છે. કોર્ટે કહ્યું કે તે ચોક્કસ પાસાઓ નક્કી કરશે કે જેના પર આગામી સ્ટેટસ રિપોર્ટ દાખલ કરવો જોઈએ અને રજિસ્ટ્રીને આ મામલાની સુઓ મોટો સંજ્ઞાન લેવાનો નિર્દેશ આપ્યો. આ કેસમાં આગામી સુનાવણી મંગળવારે થશે.

સરકારે હાઈકોર્ટને શું કહ્યું?

સરકારે હાઈકોર્ટને જણાવ્યું હતું કે, ઉજવણી દરમિયાન અપેક્ષિત ભીડનો અંદાજ કાઢવા માટે પાણીના ટેન્કર, એમ્બ્યુલન્સ અને કમાન્ડ એન્ડ કંટ્રોલ વાહનો પણ હાજર હતા, અને આ સંખ્યા અગાઉની મેચો કરતા ઘણી વધારે હતી. તેમ છતાં, રાજ્યએ કહ્યું કે 2.5 લાખથી વધુ લોકો આવ્યા હોવાથી પરિસ્થિતિ વધુ ખરાબ થઈ ગઈ, જેમાંથી ઘણાનું માનવું હતું કે સ્ટેડિયમમાં મફત પ્રવેશ મળશે. 

બપોર સુધીમાં લોકો સ્થળ પર એકઠા થવા લાગ્યા હતા

સ્ટેડિયમની ક્ષમતા 35,000 છે અને સામાન્ય રીતે ફક્ત 30,000 ટિકિટ વેચાય છે. એડવોકેટ જનરલ શશીકિરણ શેટ્ટીના જણાવ્યા અનુસાર, બપોર સુધીમાં લોકો સ્થળ પર એકઠા થવા લાગ્યા હતા અને બપોરે 3 વાગ્યા સુધીમાં આ વિસ્તાર સંપૂર્ણપણે ઘેરી લેવામાં આવ્યો હતો. ભીડમાં રાજ્ય બહારના લોકો પણ હતા. ત્યારબાદ શેટ્ટીએ સ્ટેડિયમનો નકશો રજૂ કર્યો જેમાં મૃત્યુ ક્યાં થયા તે દર્શાવવામાં આવ્યું હતું: ગેટ 7 (4 મૃત્યુ), ગેટ 6 (3 મૃત્યુ) અને ક્વીન્સ રોડ (4 મૃત્યુ).

ભાજપ સાંસદ સંબિત પાત્રાએ પણ આ સમગ્ર મામલા પર પ્રતિક્રિયા આપી છે. તેમણે સમગ્ર મામલે કર્ણાટક સરકારને ઘેરી લીધી. સંબિતે કહ્યું- બીસીસીઆઈ પ્રમુખ અને ચેરમેને કહ્યું કે તેમને આવા કોઈ કાર્યક્રમની જાણ નથી. ભૂતકાળમાં પણ વિજય પછી વિજય પરેડ યોજાતી રહી છે, પરંતુ તે સામાન્ય રીતે વિજય પછી ઓછામાં ઓછા બે દિવસ પછી થતી હતી, જેથી ભીડને સંભાળવાની તૈયારી કરી શકાય. આ વખતે મુખ્યમંત્રી અને નાયબ મુખ્યમંત્રીએ ટીમ પર તાત્કાલિક શોભાયાત્રા કાઢવા દબાણ કર્યું અને માત્ર 12 કલાકમાં વ્યવસ્થા કરવામાં આવી. પરિણામે 11 લોકોએ જીવ ગુમાવ્યા.

તેમણે વધુમાં કહ્યું- જ્યારે અલ્લુ અર્જુનની ફિલ્મના પ્રદર્શન દરમિયાન ભાગદોડ થઈ ત્યારે તેમની ધરપકડ કરવામાં આવી હતી. કર્ણાટક સરકારે પોતે ધરપકડનો આદેશ આપ્યો હતો. તો શું ડીકે શિવકુમાર અને સિદ્ધારમૈયાની પણ આ જ રીતે ધરપકડ કરવામાં આવશે?

અમે આરસીબીને અનુરોધ નો’તો કર્યો કે તે ટીમને લઈને આવે: કર્નાટક સરકાર

આ સમગ્ર મામલામાં, કર્ણાટકના ગૃહમંત્રી જી પરમેશ્વરને પૂછવામાં આવ્યું કે આરસીબીની ઉજવણી માટે ઉતાવળ શું હતી, ત્યારે તેમણે કહ્યું - આ (સ્ટેડિયમમાં વિજય પરેડ અને ઉજવણી) અમારા તરફથી નહોતી. અમે આરસીબી કે કેએસસીએ (કર્ણાટક ક્રિકેટ સ્ટેટ એસોસિએશન) ને ઉજવણી માટે કોઈ વિનંતી કરી ન હતી. તેઓએ આ કાર્યક્રમનું આયોજન કર્યું. અમને લાગ્યું કે સરકારે ટીમનું સન્માન કરવું જોઈએ, કારણ કે તે બેંગ્લોરની ટીમ હતી, તેથી અમે વિચાર્યું કે આપણે પણ આ ઉજવણીનો ભાગ બનવું જોઈએ. બસ. અમે એવું કહ્યું ન હતું કે અમે આ આયોજન કરીશું, પરંતુ આરસીબી અને કેએસસીએ ટીમને ઉજવણી માટે બેંગ્લોર આવ્યા.

આઠ લાખ લોકો સ્ટેડીયમ પહોંચ્યા કર્ણાટકના ગૃહમંત્રીનો દાવો

કર્ણાટકના ગૃહમંત્રી જી પરમેશ્વરે દાવો કર્યો છે કે રોયલ ચેલેન્જર્સ બેંગ્લોરની જીતની ઉજવણી કરવા માટે લગભગ 8 લાખ લોકો ચિન્નાસ્વામી સ્ટેડિયમ પહોંચ્યા હતા. આટલી મોટી ભીડને કારણે બુધવારે સાંજે નાસભાગ મચી ગઈ, જેમાં ૧૧ લોકોના મોત થયા અને ૪૭ લોકો ઘાયલ થયા. તેમણે કહ્યું, "અમે વિધાન સૌધાની બહાર એક લાખ લોકો અને સ્ટેડિયમની બહાર 25,000 લોકોનો અંદાજ લગાવ્યો હતો, પરંતુ અમને 2.5 લાખ લોકોની પણ અપેક્ષા નહોતી. 8.70 લાખ મેટ્રો ટિકિટ વેચાઈ હતી, જેના કારણે અંદાજે 8 લાખ લોકો ક્રિકેટ ચાહકો તરીકે પહોંચ્યા હતા."