તાઈવાનની રાજધાની તાઈપેઈનું વ્યસ્ત શોપિંગ ડિસ્ટ્રિક્ટ શુક્રવારે લોહીલુહાણ થઈ ગયું હતું. એક માથાભારે હુમલાખોરે ભીડભાડ વાળા વિસ્તારમાં ઘૂસીને સ્મોક ગ્રેનેડ અને ચાકુ વડે નિર્દોષ લોકો પર હુમલો કરતા સમગ્ર વિસ્તારમાં અફરાતફરી મચી ગઈ હતી. આ ભયાનક ઘટનામાં 3 લોકોના કરુણ મોત થયા છે, જ્યારે 11 લોકો ગંભીર રીતે ઈજાગ્રસ્ત થયા છે.

રોઇટર્સ દ્વારા મેળવવામાં આવેલા વીડિયો ફૂટેજમાં જોઈ શકાય છે કે, હુમલા બાદ ઈમરજન્સી સેવાઓ તુરંત કાર્યરત થઈ ગઈ હતી. પેરામેડિક્સ રસ્તા પર જ ઘાયલોને સીપીઆર (CPR) આપી રહ્યા હતા અને ડઝનબંધ પોલીસ વાહનોએ વિસ્તારને ઘેરી લીધો હતો. આસપાસના લોકો ભયભીત અવસ્થામાં આ દ્રશ્યો જોઈ રહ્યા હતા.

હુમલાખોરનું મોત
પોલીસે શનિવારે (20 ડિસેમ્બર) સત્તાવાર નિવેદનમાં જણાવ્યું હતું કે, હુમલાખોરની ઓળખ 27 વર્ષીય ચાંગ વેન તરીકે થઈ છે, જે ઉત્તર તાઈવાનના તાઓયુઆન શહેરનો રહેવાસી હતો. શુક્રવારે સાંજે પોલીસ જ્યારે તેનો પીછો કરી રહી હતી, ત્યારે તે એક બિલ્ડિંગ પરથી નીચે પડ્યો હતો, જેમાં તેનું મોત નીપજ્યું હતું. પોલીસના જણાવ્યા અનુસાર, હુમલાખોરે આ કાંડ એકલા હાથે જ અંજામ આપ્યો હતો.