રાજકોટ મહાપાલિકામાં આજે મળેલી સ્ટેન્ડિંગ કમિટીની મિટિંગમાં લાલપરી તળાવનું ડેવલપમેન્ટ તથા બ્યુટિફિકેશન માટે ૧૮.૧૧ કરોડનો ખર્ચ મંજૂર કરાયો હતો તેમજ આ કામગીરી કરવાનો કોન્ટ્રાક્ટ લોએસ્ટ ઓફર રજૂ કરનાર બી.બી.પટેલ કન્સ્ટ્રકશન કંપનીને આપવાનું મંજૂર કરાયું હતું તેમ સ્ટેન્ડિંગ કમિટી ચેરમેનએ જણાવ્યું હતું.

વિશેષમાં દરખાસ્તમાં જણાવ્યા મુજબ, તળાવના કાંઠે ૧૦૯૫૦ ચોરસ મીટર જમીનમાં ગાર્ડન વર્ક, એક કિલોમીટર લંબાઈની ગેબીયન વોલ, ૮૫૦ રનિંગ મીટર ફૂટપાથ તેમજ ૧૬૫૦ રનિંગ મીટરના ગજેબો સહિતનું ડેવલપમેન્ટ અને બ્યુટિફિકેશન કરવામાં આવશે.

અત્રે ઉલ્લેખનીય છે કે જ્યાં ગાર્ડન, ગજેબો, ગેબીયન વોલ, વોકિંગ ટ્રેક, ફૂટપાથ વિગેરે સૂચવ્યું છે ત્યાં હાલ સ્થળ ઉપર ઝૂંપડા, મકાનો, કારખાના સહિતના દબાણો હોવાની ચર્ચા સામે આવી છે. જો ડેવલપમેન્ટ કે બ્યુટિફિકેશન કરવું જ હોય તો અહીંયા સૌપ્રથમ ઝૂંપડપટીનું મેગા ડિમોલિશન કરવું પડે તેવી સ્થિતિ નિર્માણ થાય તેમ હોવાનું જાણવા મળે છે.

લાલપરી કાંઠે દબાણો મામલે પૂછતા સ્ટેન્ડિંગ કમિટી ચેરમેને જણાવ્યું હતું કે ત્યાં આગળ દબાણો હોવાનું તેમના ધ્યાનમાં નથી, છતાં આ મામલે તેઓ તપાસ કરાવશે તેમ જણાવ્યું હતું.