બ્રિટિશ સરકારે શનિવારે મોડી રાત્રે જાહેરાત કરી હતી કે જાતીય શોષણની તસવીરો બનાવવા માટે ઉપયોગમાં લેવાતા આર્ટિફિશિયલ ઈન્ટેલિજન્સ (એઆઇ) ટૂલ્સ સામે કાયદો દાખલ કરનાર તે પહેલો દેશ બનશે. ગૃહ પ્રધાન યવેટ કૂપરે જણાવ્યું હતું કે સરકાર બાળકોની લૈંગિક છબીઓ બનાવવા માટે રચાયેલ એઆઇ ઉપકરણો રાખવા, બનાવવા અથવા વિતરણ કરવાને ગેરકાયદેસર બનાવશે, જે પાંચ વર્ષ સુધીની જેલની સજાને પાત્ર છે.
મિનિસ્ટર કૂપરે કહ્યું કે આશા છે કે અન્ય દેશો પણ આવા કાયદા લાવીને બ્રિટનને અનુસરશે. એઆઈ ’પીડોફાઈલ મેન્યુઅલ’ ધરાવવું પણ ગેરકાયદેસર હશે, જે લોકોને બાળકોનું જાતીય શોષણ કરવા માટે એઆઈનો ઉપયોગ કેવી રીતે કરવો તે શીખવે છે. જે ત્રણ વર્ષની જેલની સજાને પાત્ર છે. પીડોફાઈલ્સ સામગ્રી બનાવવામાં મદદ કરતી વેબસાઇટ્સ સામે પણ પગલાં લેવામાં આવશે.