રાજ્યમાં હાલ મોન્સૂન સિઝન દરમિયાન ભારે વરસાદની કોઈ મોટી શક્યતા દેખાઈ રહી નથી. હવામાન વિભાગની તાજી માહિતી અનુસાર, આગામી સાત દિવસ દરમિયાન ગુજરાતના જુદા જુદા વિસ્તારોમાં માત્ર છૂટાછવાયા અને હળવાથી મધ્યમ વરસાદી ઝાપટાં જ પડે તેવી સંભાવના છે.
હાલ વાતાવરણમાં મોન્સૂન ટ્રફ, વેસ્ટર્ન ડિસ્ટર્બન્સ અને સાયક્લોનિક સર્ક્યુલેશન જેવી હવામાની સિસ્ટમો સક્રિય હોવા છતાં, કોઈ મજબૂત સિસ્ટમનો અભાવ હોવાથી મુસળધાર વરસાદ પડે તેવા એંધાણ નથી. આ જ કારણે વાદળછાયું વાતાવરણ જળવાઈ રહેશે, પરંતુ મોટાભાગના વિસ્તારોમાં માત્ર હળવો વરસાદ જ નોંધાશે.

રાજ્યમાં સિઝનનો નોંધપાત્ર ચોમાસું સમયગાળો વિત્યા બાદ પણ સરેરાશ વરસાદની સ્થિતિ ચિંતાજનક છે. આંકડાઓ અનુસાર, અત્યાર સુધીમાં ગુજરાતમાં સામાન્ય કરતાં આશરે 16 ટકા વરસાદની ખાધ નોંધાઈ છે. પ્રદેશ વાઈઝ સરખામણી કરીએ તો ગુજરાત રિજનમાં વરસાદની ઘટ માત્ર એક ટકો છે, પરંતુ સૌરાષ્ટ્ર અને કચ્છ રિજનમાં આ તફાવત ઘણો મોટો છે, જ્યાં 37 ટકા જેટલો ઓછો વરસાદ થયો છે.
વરસાદની આ મોટી ક્ષતિના કારણે સૌરાષ્ટ્ર અને કચ્છના ખેડૂતો ભારે આર્થિક અને માનસિક ચિંતામાં મુકાયા છે. જળાશયો અને ડેમોમાં પણ પૂરતો પાણીનો જથ્થો ન હોવાથી આગામી સમયમાં સિંચાઈ અને પીવાના પાણીની સમસ્યા ઘેરી બને તેવી શક્યતા સેવાઈ રહી છે.