અમરેલી જિલ્લાના સાવરકુંડલા તાલુકામાં એન્ટી કરપ્શન બ્યુરો (ACB) એ સફળ ટ્રેપ યોજીને સાવરકુંડલા રૂરલ પોલીસ સ્ટેશનના એક એસિસ્ટન્ટ સબ ઈન્સ્પેક્ટર (ASI) ને રૂ. 5,000 ની લાંચ લેતા રંગેહાથ ઝડપી પાડ્યો છે.

દારૂનો ધંધો ફરીથી શરૂ કરવા માટે દબાણ કરી લાંચ માંગનાર પોલીસ કર્મચારી સામે એસીબીએ કાયદાકીય શિકંજો કસ્યો છે. આ સમગ્ર ઘટનાક્રમ અંગેનો સવિસ્તાર અહેવાલ નીચે મુજબ છે.

અમરેલી જિલ્લાના સાવરકુંડલા તાલુકાના હાથસણી રોડ પર રહેતા અને સાવરકુંડલા રૂરલ પોલીસ સ્ટેશનમાં ASI તરીકે ફરજ બજાવતા 39 વર્ષીય શ્યામભાઈ અનંતરાય બગડા સામે એસીબીએ આ કાર્યવાહી કરી છે.

ફરિયાદી અગાઉ દેશી દારૂનો ધંધો કરતા હતા, પરંતુ હાલમાં તેમણે આ ધંધો સંપૂર્ણપણે બંધ કરી દીધો હતો. તેમ છતાં, આરોપી ASI દ્વારા તેમને દારૂનો ધંધો ફરીથી શરૂ કરવા માટે સતત દબાણ કરવામાં આવતું હતું. જો તેઓ ધંધો શરૂ નહીં કરે તો તેમની સામે પ્રોહિબિશન હેઠળ ખોટા કેસો કરી જેલમાં ધકેલી દેવાની ધમકી આપવામાં આવી હતી.

રૂ. 10,000 ની માંગણી સામે રૂ. 5,000 માં નક્કી થયો વહીવટ
દારૂનો ધંધો શરૂ કરવા દેવાની અવેજીમાં અને પોલીસ કાર્યવાહીથી બચાવવા માટે આરોપી ASI એ ફરિયાદી પાસે પ્રથમ રૂ. 10,000 ની લાંચની માંગણી કરી હતી. જોકે, ફરિયાદી સાથે રકઝકના અંતે રૂ. 5,000 ની લાંચ આપવાનું નક્કી થયું હતું.

ફરિયાદી આ લાંચની રકમ આપવા માંગતા ન હોવાથી તેમણે જાગૃત નાગરિક તરીકે એસીબીના ટોલ ફ્રી નંબર 1064 પર સંપર્ક કર્યો હતો અને અમરેલી એસીબી પોલીસ સ્ટેશન ખાતે આવીને વિધિવત ફરિયાદ નોંધાવી હતી.

ઓળીયા ગામની સીમમાં ગોઠવાયું લાંચનું છટકું
ફરિયાદના આધારે અમરેલી એસીબીના ઇન્ચાર્જ પોલીસ ઇન્સ્પેક્ટર શ્રી ટી.એસ. રીઝવી અને તેમની ટીમ દ્વારા 20 ઓગસ્ટ 2026 ના રોજ લાંચના છટકાનું આયોજન કરવામાં આવ્યું હતું.

સાવરકુંડલા તાલુકાના ઓળીયા ગામની સીમમાં, ઝવેરભાઈ પટેલની વાડીના ઝાંપા પાસે નેસડી જવાના કાચા માર્ગ પર આરોપી ASI શ્યામભાઈ બગડાએ ફરિયાદી પાસેથી રૂ. 5,000 ની લાંચની રકમ સ્વીકારી હતી.

​​​​​​​લાંચની રકમ સ્વીકારતાં જ સ્થળ પર હાજર એસીબીની ટીમે તેને રંગેહાથ ઝડપી લીધો હતો અને લાંચની સમગ્ર રકમ રિકવર કરી હતી. પોતાના હોદ્દાનો દુરુપયોગ કરી ગુનો આચરનાર આરોપી ASI ની અટકાયત કરી આગળની કાનૂની કાર્યવાહી હાથ ધરવામાં આવી છે.