અમેરિકા અને ઈરાન ફરી એકવાર એકબીજા પર મિસાઈલ અને ડ્રોનનો વરસાદ શરૂ કરી દીધો છે. ઈરાને મધ્ય પૂર્વના અનેક દેશોમાં અમેરિકન ઠેકાણાઓને નિશાન બનાવ્યા છે, જ્યારે અમેરિકાએ ઈરાની મિસાઈલ સિસ્ટમ અને એર ડીફેન્સ સીસ્ટમ પર એર સ્ટ્રાઈક કરી છે જેના કારણે હોર્મુઝ સ્ટ્રેટ ફરી એકવાર સંઘર્ષનું કેન્દ્રબિંદુ બની ગયું છે. અમેરિકા અને ઈરાન વચ્ચે તણાવ વધી રહ્યો છે. અમેરિકન સૈન્યએ હોર્મુગોઝન, મરકાઝી, આહવાઝ, બુશેહર, ખુઝેસ્તાન અને સિસ્તાન-બલુચેસ્તાન સહિત અનેક ઈરાની પ્રાંતોમાં હુમલાઓ શરૂ કર્યા. ખુઝેસ્તાનમાં એક વ્યક્તિનું મોત થયું અને પાંચ અન્ય ઘાયલ થયા. યુએસ સેન્ટ્રલ કમાન્ડએ સોશિયલ મીડિયા પ્લેટફોર્મ એક્સ પર જાહેરાત કરી હતી કે અમેરિકાએ રવિવારથી ઈરાન સામે હવાઈ હુમલાઓની એક નવી શસીરીઝ શરૂ કરી છે. યુએસ અધિકારીઓના જણાવ્યા અનુસાર, આ હુમલાઓમાં ઈરાની મિસાઈલ સિસ્ટમ, હવાઈ સંરક્ષણ સ્થળો અને હાઇ-સ્પીડ આઈઆરજીસી સ્પીડબોટને નિશાન બનાવવામાં આવ્યા હતા. સેન્ટકોમના પ્રવક્તા ટિમ હોકિન્સે જણાવ્યું હતું કે યુએસ ફાઇટર જેટ્સે મધ્ય-હવામાં ઈરાની ક્રુઝ મિસાઈલ અને એક આત્મઘાતી ડ્રોનને તોડી પાડ્યું હતું. રવિવારે બપોરે રોઇટર્સ સાથેના ટેલિફોન ઇન્ટરવ્યુમાં, યુએસ રાષ્ટ્રપતિ ડોનાલ્ડ ટ્રમ્પે હવાઈ હુમલાઓનો ઉલ્લેખ કરતા કહ્યું, અમે તેમની ખરાબ રીતે ધોલાઈ કરી રહ્યા છીએ. યુએસ હુમલાઓ પછી, બંદર અબ્બાસના પશ્ચિમ વિસ્તારોમાં બ્લાસ્ટના અવાજો સંભળાયા - જેમાં કેશમ ટાપુ, જસ્ક, સિરિક અને બુશેહરના કેટલાક ભાગોનો સમાવેશ થાય છે. કેશમના ગવર્નર હુસૈન અમીર-તૈમુરીએ અહેવાલ આપ્યો કે ટાપુ પર 10 થી 11 દુશ્મન પ્રોજેક્ટાઇલ ત્રાટક્યા હતા. તેમણે નોંધ્યું કે હુમલાઓએ લશ્કરી સ્થાપનોને નિશાન બનાવ્યા હતા અને નાગરિક જાનહાનિના કોઈ અહેવાલ નથી. લેબનીઝ ન્યૂઝ ચેનલ અલ-માયાદીન અનુસાર, યુએસ ફાઇટર જેટ અને મિસાઇલોએ અત્યાર સુધીમાં સમગ્ર ઈરાનમાં 14 અલગ અલગ પ્રાંતોને નિશાન બનાવ્યા છે. યુએસ હુમલાઓનો બદલો લેવા માટે, ઈરાને મધ્ય પૂર્વમાં યુએસ સાથે જોડાયેલા લક્ષ્યો પર રોકેટ અને ડ્રોનનો આક્રમણ છોડ્યું. ઈરાને જોર્ડનમાં યુએસ કમાન્ડ સેન્ટર, કુવૈતમાં હિમરાસ મિસાઇલ લોન્ચર સિસ્ટમ, ઓમાનમાં એરક્રાફ્ટ કેરિયર સપોર્ટ પ્લેટફોર્મ અને કતારમાં જેટ મેન્ટેનન્સ સેન્ટર પર હુમલાઓની જવાબદારી સ્વીકારી છે. જો કે, ઈરાનની રાજ્ય સમાચાર એજન્સી આઈઆરએનએ અનુસાર, હોર્મોઝગાનમાં યુએસ હુમલા દરમિયાન એક જાળવણી કાર્યકરનું મોત થયું હતું અને બે અન્ય ઘાયલ થયા હતા. વધુમાં, ઈરાનના મહશહરમાં પાણીના પમ્પિંગ સ્ટેશન પર યુએસ હુમલામાં એક વ્યક્તિનું મોત થયું હતું અને ચાર ઘાયલ થયા હતા. ઈરાનના વિદેશ મંત્રાલયે અમેરિકાના હુમલાઓની કડક નિંદા કરી છે, તેમને આક્રમક ગણાવ્યા છે. ઈરાને એવો પણ આરોપ લગાવ્યો છે કે શનિવારે મસ્કતમાં દરિયાઈ માર્ગો અંગે ઈરાન અને ઓમાન વચ્ચે થયેલી વાતચીત અમેરિકાના દબાણને કારણે પરિણામ આપી શકી નથી.