વિશ્વભરના અનેક અબજોપતિઓ અને અમીર કરદાતાઓ હવે બ્રિટન જેવા દેશો છોડીને ગ્રીસ (એથન્સ) તરફ વળી રહ્યા છે. છેલ્લા 2 થી 3 વર્ષમાં આ ટ્રેન્ડ ખૂબ જ ઝડપથી વધ્યો છે. તાજેતરમાં યુકેના અબજોપતિ હેજ ફંડ મેનેજર ક્રિસ રોકોસે લંડન છોડીને ગ્રીસમાં પોતાની ટેક્સ રેસિડેન્સી શિફ્ટ કરવાનો નિર્ણય લેતા આ મુદ્દો ફરી ચર્ચામાં આવ્યો છે. 'રોકોસ કેપિટલ મેનેજમેન્ટ'ના સ્થાપક રોકોસે ગયા વર્ષે બ્રિટનમાં આશરે 330 મિલિયન પાઉન્ડ એટલે કે લગભગ 4235 કરોડ રૂપિયાનો ટેક્સ ચૂકવ્યો હતો. તેમનું ગ્રીસ જવું દર્શાવે છે કે યુરોપમાં ધનિકો માટે ગ્રીસ હવે સૌથી આકર્ષક સ્થળ બની રહ્યું છે.

વેલ્થ માઇગ્રેશન પર કામ કરતી સંસ્થા હેનલી એન્ડ પાર્ટનર્સના રિપોર્ટ અનુસાર, વર્ષ 2025 માં આશરે 1200 થી વધુ કરોડપતિઓ ગ્રીસમાં સ્થાયી થવાનો અંદાજ હતો અને વર્ષ 2026 માં પણ આ આંકડો ઝડપથી વધી રહ્યો છે. ગ્રીસનું સૌથી મોટું આકર્ષણ તેનો 'નોન-ડોમ ટેક્સ રેસિડેન્સી પ્રોગ્રામ' છે. આ પ્રોગ્રામ હેઠળ વિદેશથી કમાણી કરતા નવા વિદેશી ટેક્સ રેસિડેન્ટ્સ પોતાની વિદેશી આવક પર વાર્ષિક માત્ર 1 લાખ યુરોનો ફ્લેટ ટેક્સ આપીને 15 વર્ષ સુધી રહી શકે છે. કરોડો યુરોની આવક ધરાવતા અબજોપતિઓ માટે સામાન્ય ઈન્કમ ટેક્સની સરખામણીમાં આ રકમ ખૂબ જ નાની સાબિત થાય છે.

બીજી તરફ, બ્રિટનમાં અમીરો માટે ટેક્સના નિયમો કડક બન્યા છે. યુકે સરકારે નોન-ડોમ સ્ટેટસ નાબૂદ કરી દીધું છે અને કેપિટલ ગેઇન્સ તેમજ મિલકત વેરાના નિયમો સખત કર્યા છે. રોકોસ ઉપરાંત લક્ષ્મી મિત્તલ અને નાસીફ સાવિરિસ જેવા મોટા ઉદ્યોગપતિઓ પણ બ્રિટન છોડી ચૂક્યા છે. ગ્રીસમાં માત્ર ટેક્સની રાહત જ નહીં, પરંતુ ત્યાંનું આહલાદક હવામાન, સમુદ્ર કિનારો, શાંત જીવનશૈલી અને 'ગોલ્ડન વિઝા પ્રોગ્રામ' પણ ધનિકોને આકર્ષી રહ્યા છે.

​​​​​​​ગ્રીસ સરકાર હવે માત્ર પ્રવાસીઓ પર નિર્ભર રહેવાને બદલે અમીર રોકાણકારો, હેજ ફંડ્સ અને પ્રાઇવેટ ઇક્વિટી કંપનીઓને આકર્ષી રહી છે. વર્ષ 2026 માં ગ્રીસે કેટલીક લાયક ફાઇનાન્શિયલ કંપનીઓ અને અધિકારીઓ માટે બોનસ પર માત્ર 5 ટકા ટેક્સ જેવા આકર્ષક ઇન્સેન્ટિવ્સ જાહેર કર્યા છે. ક્રિસ રોકોસનું એથન્સમાં નવી ઓફિસ ખોલવાનું પગલું દર્શાવે છે કે અબજોપતિઓ હવે માત્ર પૈસા કમાવા માટે જ નહીં, પરંતુ ટેક્સ બચત અને બહેતર લાઈફસ્ટાઈલ માટે પણ ગ્રીસને પ્રથમ પસંદગી બનાવી રહ્યા છે.