અકસ્માતના આ બનાવની જાણવા મળતી વિગતો મુજબ, લોધિકામાં ગોકુલ ચોક પાસે રહેતો અમિત રાકેશભાઇ પરમાર(ઉ.વ ૧૫) તેના કુંટુબી ભત્રીજા વિવેક વિજયભાઇ પરમાર(ઉ.વ ૧૫) સાથે બાઇકમાં ગઇકાલે રાત્રીના લોધિકાના માખાવડ ગામે ગરબી જોવા માટે ગયા હતાં. ગરબી જોયા બાદ રાત્રીના ૧૧ પરત ફરતા હતા ત્યારે અહીં માખાવડ પાસે બંધ ટ્રેકટરની ટ્રોલી પાછળ બાઇક અથડાતા બંને ગંભીર રીતે ઘવાયા હતાં. જેથી તેમને સારવાર માટે લોધિકા સરકારી હોસ્પિટલ ખસેડવામાં આવ્યા હતાં. જયાં સારવાર કારગત નીવડે તે પૂર્વે અમિત પરમાર(ઉ.વ ૧૫) નું મોત થયું હતું જયારે વિવેકને વધુ સારવાર માટે રાજકોટ સિવિલ હોસ્પિટલ ખસેડવામાં આવ્યો હતો.

અકસ્માતના આ બનાવની વધુમાં જાણવા મળતી વિગતો મુજબ, અમિત ત્રણ ભાઇ એક બહેનના પરિવારમાં સૌથી નાનો હતો અને ધો.૧૦ માં અભ્યાસ કરતો હતો. સગીર તેના કુંટુબી ભાઇ વિજય મૂકેશભાઇ પરમાર પાસેથી બાઇક લઇ તેના પુત્ર વિવેક પરમારને લઇ ગરબી જોવા ગયો હતો. ત્યારે આ મામલે સગીરના પિતા રાકેશ ખોડાભાઇ પરમાર(ઉ.વ ૪૦) ની ફરિયાદ પરથી બાઇક ચલાવનાર તેમના મૃત પુત્ર અમિત ઉપરાંત સગીર પાસે લાઇસન્સ ન હોવા છતા તેને બાઇક ચલાવવા આપનાર વિજય મુકેશભાઇ પરમાર સામે ગુનો નોંધાયો છે.