રાજકોટ, લોધિકા અને પડધરી તાલુકાના 180 ગામોનું વિશાળ કાર્યક્ષેત્ર ધરાવતા રાજકોટના બેડી માર્કેટ યાર્ડમાં આજે સોમવારે સવારે ખુલતી બજારે થયેલી હરાજીમાં 35000 મણ મગફળી અને 20,000 મણ કપાસની આવક થઇ હતી. જો કે છેલ્લા બે દિવસથી સતત વરસાદી હવામાનને કારણે આજે પલળેલો અને ભેજયુક્ત જથ્થો વધુ આવ્યો હતો.
વિશેષમાં રાજકોટ માર્કેટ યાર્ડના સૂત્રોના જણાવ્યા મુજબ આજે મગફળીમાં 35000 હજાર ગુણીની આવક સામે ગુણવત્તા અનુસાર ભાવ સરેરાશ રૂ.850થી 1180 સુધી રહ્યા હતા, અમુક ટોપ ક્વોલિટીમાં 1200થી 1400ના ભાવે પણ સોદા પડ્યા હતા. જ્યારે કપાસમાં 20,000 મણની આવક સામે પ્રતિ 20 કિલોનો ભાવ ગુણવત્તા અનુસાર રૂ.1300થી 1400 સુધી રહ્યો હતો, જ્યારે અમુક ટોપ ક્વોલિટીમાં 1400થી 1600 સુધીના ભાવે સોદા પડ્યા હતા.
જ્યારે ચાલુ વર્ષે રાજકોટ જિલ્લામાં સોયાબિનનું વાવેતર વધુ થયું હોય અને ઉત્પાદન પણ સારૂ આવ્યું હોય નવી સિઝનની પ્રારંભથી જ સોયાબિનની ધૂમ આવક થઈ રહી છે, આજે રાજકોટ યાર્ડમાં 10 હજાર મણ સોયાબીનની આવક થઇ હતી.
હજુ વરસાદની આગાહી હોય યાર્ડમાં પ્લેટફોર્મમાં સમાય તેટલી મર્યિદિત આવકને એન્ટ્રી અપાઇ રહી છે.