હવામાન વિભાગની આગાહી મુજબ સાઇકલોનિક સર્ક્યુલેશનને કારણે સૌરાષ્ટ્ર કચ્છના અર્ધો અર્ધ વિસ્તારમાં એટલે કે કુલ 90 માંથી 46 તાલુકામાં ભારે પવન અને વીજળીના કડાકા ભડાકા સાથે ઝાપટાથી માંડીને પોણા સાત ઇંચ જેટલો કમોસમી વરસાદ વરસી જતા વૃક્ષો અને કાચા મકાનો ધરાશાયી થવાના અનેક બનાવો બનવા ઉપરાંત ઉનાળુ પાક લેનારા ખેડૂતો ચિંતાતુર બન્યા છે. જેમાં સૌથી વધુ ભાવનગર ના મહુવા ખાતે પોણા સાત ઇંચ અમરેલીના લાઠી સાવરકુંડલા લીલીયા અને અમરેલી પંથકના બે થી 4:30 ઇંચ સહિત નવું જિલ્લામાં વરસાદ પડ્યો છે પોરબંદર, દેવભૂમિ દ્વારકા અને મોરબી જિલ્લામાં ખાસ કમોસમી વરસાદના વાવડ નથી. જોકે વાવાઝોડા જેવો આખા સૌરાષ્ટ્ર કચ્છમાં ફૂંકાયો હોવાને કારણે વૃક્ષો પડી જવાના અને કેરી સહિતના બાગાયતી પાકોને નુકસાન થવા પામ્યું છે.

સાયકલોનિક સર્ક્યુલેશનને કારણે ભારે પવન સાથે સર્જાયેલી કમોસમી વરસાદના હવામાન પલટામાં આજે સવારે પૂરા થતા છેલ્લા 24 કલાક દરમિયાન ભાવનગર જિલ્લામાં મહુવા પોણા સાત ઇંચ, જેસર ગારીયાધાર, સિહોર, પાલીતાણા, ઘોઘા, ઉમરાળામાં અડધોથી એક ઇંચ, અમરેલી જિલ્લામાં લાઠી સાડા ચાર ઇંચ સાવરકુંડલા લીલીયા અમરેલી બાબરા અને રાજુલા પંથકમાં એક થી સવા બે ઇંચ કમોસમી વરસાદ નોંધાયો છે.

રાજકોટ જિલ્લામાં ગોંડલ ખાતે દોઢી જ જ્યારે જસદણ વિછીયા જામકંડોરણા રાજકોટ શહેર કોટડા સાંગાણી પંથકમાં અડધાથી પોણા ઇંચ કમોસમી વરસાદ નોંધાયો હતો. જ્યારે કચ્છના નખત્રાણામાં એક ઇંચ અને ભુજ, અંજાર, ભચાઉમાં ઝાપટાથી માંડીને પા ઇંચ, સુરેન્દ્રનગર જિલ્લામાં દસાડા એક ઇંચ જ્યારે ચુડા, થાનગઢ અને સાયલા પંથકમાં ઝાપટા થી પા ઇંચ, ગીર સોમનાથ જિલ્લામાં ઉના અને ગીર ગઢડા પંથકમાં પોણો ઈંચ બોટાદ જિલ્લાના બરવાળા, બોટાદ શહેર, રાણપુર, ગઢડા પંથકમાં અડધોથી પોણો ઈંચ, જુનાગઢ જિલ્લામાં વિસાવદર અને માંગરોળમાં ઝાપટાથી પા ઇંચ, જ્યારે જામનગરના કાલાવડ અને જોડિયામાં પણ ઝાપટાથી માંડીને પા ઇંચ કમોસમી વરસાદ નોંધાયો હતો.