પશ્ચિમ બંગાળમાં પ્રથમ તબક્કાના મતદાન બાદ અનેક વિસ્તારોમાંથી મોટા પ્રમાણમાં દેશી બોમ્બ મળી આવ્યા હોવાના અહેવાલોને પગલે ચૂંટણી પંચ હરકતમાં આવ્યું છે. મતદારો નિર્ભયપણે પોતાના મતાધિકારનો ઉપયોગ કરી શકે અને ચૂંટણી પ્રક્રિયા પારદર્શક રહે તે માટે NIAની ખાસ ટીમો મેદાનમાં ઉતારવામાં આવી છે.

તૃણમૂલ કાર્યકરના ઘરેથી મળ્યા ૭૯ દેશી બોમ્બ
તાજેતરમાં પશ્ચિમ બંગાળના ભાંગર વિસ્તારમાં તૃણમૂલ કોંગ્રેસના એક કાર્યકર રફીકુલ ઈસ્લામના ઘરેથી ૭૯ દેશી બોમ્બ મળી આવ્યા હતા. ચોક્કસ ગુપ્ત માહિતીના આધારે હાથ ધરવામાં આવેલા આ સર્ચ ઓપરેશન બાદ રાજકીય ગલિયારાઓમાં ખળભળાટ મચી ગયો છે. NIAએ આ મામલે તપાસ શરૂ કરી દીધી છે અને વિસ્ફોટક સામગ્રી જપ્ત કરી સંવેદનશીલ વિસ્તારોમાં વોચ વધારી દીધી છે.

પોલીસ અધિકારીઓને કડક સૂચના
ચૂંટણી પંચે સુરક્ષા વ્યવસ્થાને લઈને ઉચ્ચ પોલીસ અધિકારીઓ માટે કડક આદેશો જારી કર્યા છે. કોલકાતા પોલીસ કમિશનરથી લઈને એસપી અને આઈસી રેન્કના અધિકારીઓને સ્પષ્ટ કહેવામાં આવ્યું છે કે જો તેમના વિસ્તારમાં કોઈ વિસ્ફોટક મળશે કે હિંસક પ્રવૃત્તિ થશે, તો સીધી જવાબદારી સંબંધિત અધિકારીની રહેશે અને તેમની સામે કડક કાર્યવાહી કરાશે. સંવેદનશીલ વિસ્તારોમાં દેખરેખ અને નિયંત્રણ વધારવા માટે ટેકનોલોજી અને એજન્સીઓના સંકલનનો ઉપયોગ કરવામાં આવી રહ્યો છે.

શાંતિપૂર્ણ મતદાન માટે માસ્ટર પ્લાન
બંગાળમાં ચૂંટણી દરમિયાન હિંસાનો ઈતિહાસ રહ્યો છે, જેને ધ્યાનમાં રાખીને ચૂંટણી પંચ આ વખતે કોઈ પણ પ્રકારની કચાશ રાખવા માંગતું નથી. ૨૯ એપ્રિલના રોજ યોજાનાર મતદાન એ અંતિમ અને નિર્ણાયક રાઉન્ડ સાબિત થવાનો છે. NIAની હાજરીથી અસામાજિક તત્વોમાં ફફડાટ ફેલાયો છે અને સુરક્ષા દળોએ ફ્લેગ માર્ચ પણ શરૂ કરી દીધી છે.
​​​​​​​

પશ્ચિમ બંગાળ વિધાનસભા ચૂંટણીના પરિણામો ૪ મે ના રોજ જાહેર કરવામાં આવશે. ત્યાં સુધી રાજ્યની કાયદો અને વ્યવસ્થા જાળવી રાખવી એ સુરક્ષા એજન્સીઓ માટે મોટો પડકાર છે.