યુએસ રાષ્ટ્રપતિ ડોનાલ્ડ ટ્રમ્પે ફરી એકવાર સ્પષ્ટ શબ્દોમાં કહી દીધું હતું કે ટેરિફ છૂટછાટની કોઈ જ જાહેરાત કરવામાં આવી નથી.કોઈપણ દેશ અન્યાયી રીતે વેપાર કરવા બદલ 'મુક્તિ' મેળવી શકશે નહીં.યુએસ કસ્ટમ્સ અને બોર્ડર પ્રોટેક્શન વિભાગે સ્માર્ટફોન, કમ્પ્યુટર્સ અને અન્ય ઇલેક્ટ્રોનિક સામાનને પારસ્પરિક ટેરિફમાંથી મુક્તિ આપતી માર્ગદર્શિકા જારી કર્યા બાદ યુએસ રાષ્ટ્રપતિ ડોનાલ્ડ ટ્રમ્પનું આ નિવેદન આવ્યું છે.વ્હાઇટ હાઉસના વરિષ્ઠ સલાહકાર સ્ટીફન મિલરે એક્સ પર લખ્યું કે આ માલ હજુ પણ ચીન પર અગાઉ જાહેર કરાયેલા 20% ટેરિફને આધીન છે. તેઓ "ગેરકાયદેસર દવાઓની સમસ્યા" પર કેનેડા, મેક્સિકો અને ચીન પર ટેરિફ લાદવાના રાષ્ટ્રપતિ ટ્રમ્પના આદેશનો ઉલ્લેખ કરી રહ્યા હતા.

ટ્રમ્પે ટ્રુથ સોશિયલ પર લખ્યું કે અન્ય દેશોએ આપણી સાથે જે અન્યાયી વેપાર પ્રથાઓ અને બિનજરૂરી ટેરિફ અવરોધો મૂક્યા છે તેના માટે હવે કોઈ 'મુક્તિઓ' નહીં - ખાસ કરીને ચીન નહીં, જેણે આપણી સાથે સૌથી ખરાબ વર્તન કર્યું છે!

૭૮ વર્ષીય ટ્રમ્પે વધુમાં કહ્યું કે શુક્રવારે 'કોઈ ટેરિફ મુક્તિની જાહેરાત કરવામાં આવી ન હતી'. તેમણે કહ્યું કે આ ઉત્પાદનો પહેલાથી જ '20% ફેન્ટાનાઇલ ટેરિફ' હેઠળ આવે છે અને હવે તેમને ફક્ત એક અલગ ટેરિફ શ્રેણી (બકેટ) માં મૂકવામાં આવી રહ્યા છે.

"આગામી રાષ્ટ્રીય સુરક્ષા ટેરિફ તપાસમાં અમે સેમિકન્ડક્ટર અને સમગ્ર ઇલેક્ટ્રોનિક્સ સપ્લાય ચેઇન પર ધ્યાન કેન્દ્રિત કરી રહ્યા છીએ, ટ્રમ્પે વધુમાં કહ્યું, "તપાસથી એ સ્પષ્ટ થઈ રહ્યું છે કે આપણે આપણા પોતાના દેશ અમેરિકામાં જ માલનું ઉત્પાદન કરવું પડશે. આપણે બીજા કોઈ દેશ પર, ખાસ કરીને ચીન જેવા દુશ્મન વેપારી દેશો પર, જે અમેરિકા અને આપણા લોકોનું અપમાન કરવાનો દરેક શક્ય પ્રયાસ કરે છે, તેના પર આધાર રાખી શકીએ નહીં."

અમે કોઈને અમારી સાથે અન્યાય કરવાની મંજુરી નહી આપીએ: ટ્રમ્પની સાફ વાત

ટ્રમ્પે વધુમાં કહ્યું, "અમે હવે તેમને વેપાર પર અમારી સાથે અન્યાયી વર્તન કરવાની મંજૂરી આપી શકીએ નહીં જેમ તેઓ ઘણા વર્ષોથી કરે છે. તે દિવસો પૂરા થઈ ગયા!" તેમણે કહ્યું, "અમેરિકામાં એક નવો સુવર્ણ યુગ આવવાનો છે, જેમાં કરવેરા કાપ અને નિયમોમાં છૂટછાટનો સમાવેશ થાય છે, જેમાંથી ઘણાને તાજેતરમાં મંજૂરી આપવામાં આવી છે. આનો અર્થ એ થશે કે વધુ અને વધુ સારી નોકરીઓ મળશે, આપણા દેશમાં માલનું ઉત્પાદન થશે અને ચીન જેવા દેશો સાથે તે જ રીતે વર્તવામાં આવશે જે રીતે તેઓએ આપણી સાથે વર્તન કર્યું છે." અંતે તેમણે કહ્યું, "પરિણામ એ આવશે કે આપણો દેશ પહેલા કરતાં વધુ મોટો, સારો અને મજબૂત બનશે. આપણે અમેરિકાને ફરીથી મહાન બનાવીશું!