જામનગર શહેર ભાજપના ૮ ઉપપ્રમુખ, ૩ મહામંત્રી, ૮ મંત્રી, ૧ ખજાનચી અને ૧ કાર્યાલય મંત્રી જેવા કુલ ૨૧ હોદા માટે નિરીક્ષકો અને શહેર ભાજપ પ્રમુખ દ્વારા ૩-૩ નામની 

પેનલ બનાવીને મોકલી દેવામાં આવી છે, હવે જયારે પ્રદેશ તરફથી પટારો ખોલવામાં આવશે ત્યારે સામે આવી જશે કે, કોને-કોને સંગઠન માળખામાં સમાવવામાં આવ્યા છે. 


ભાજપ અત્યારે સાૌથી મોટો રાજકીય પક્ષ છે, લાંબા સમયથી સત્તા પર છે, ત્રિપલ એન્જીન સરકારો ચાલી રહી છે, પક્ષનો સુર્ય મઘ્યાહને તપી રહ્યો છે એટલે સ્વભાવીક રીતે ભાજપમાં જયારે હોદા લેવાની વાત આવે ત્યારે અનેક આંગળીઓ ઉંચી થાય છે અને આટલું જ નહીં આવી તમામ આંગળીઓ પોતાના બાવળામાં જેટલું બળ હોય તેનો ઉપયોગ કરી લે છે, કારણ કે ભાજપના કોઇપણ હોદા પર બેસવું એટલે વર્તમાન સંજોગોમાં અનેક રીતે ફાયદાકારક ગણી શકાય, આ સંગઠનના ટ્રેક પરથી જ રાજકીય ભવિષ્યના જોઇતા સ્ટેશનો આવે છે, એટલા માટે જ હોદાઓ માટે ઉપરથી ભલે ન દેખાય અંદર ખાને પુરેપુરી તાકાત લગાડવામાં આવે છે, એટલે રસપ્રદ બની રહેશે કે બીનાબેનની ટીમમાં કોને સ્થાન મળે છે, કોને નહીં.

​​​​​​​
જે રીતે પ્રદેશ ભાજપની જાહેર કરાયેલી નવી ટીમમાં જુના તમામની બાદબાકી કરવામાં આવી, તમામ નવા ચહેરાઓને તક આપવામાં આવી તેના પરથી એવા સંકેત મળે છે કે કદાચ શહેર જિલ્લાની સંગઠન પાંખમાં પણ ભારતીય જનતા પાર્ટી નો-રીપીટની થીયરી અપનાવી શકે છે અને જો આમ થશે તો તમામ ૨૧ હોદા પર ફ્રેશ ચહેરા આવી શકે છે. ​​​​​​​

ભાજપના ટોંચના નેતાઓ વચ્ચે અંદરખાને બળાબળના પારખા 

શહેર ભાજપ પ્રમુખ સિવાયની ટીમની રચના માટે ગતિવિધીઓ તેજ બની છે, સ્વભાવીક રીતે શહેર ભાજપ સંગઠનમાં સ્થાન પામવા માટેની આતુરતા બધામાં જોવા મળી રહી છે અને સુત્રોમાંથી તો ત્યાં સુધી જાળવા મળ્યું છે કે, શહેરના સંગઠનમાં પોતાના વફાદારોને સ્થાન અપાવા માટે ભાજપની ટોંચની નેતાગીરી વચ્ચે અંદરખાને પુરી તાકાત લગાડવામાં આવી રહી છે અને ગેમ તેમ કરીને પોતાના વફાદારને સેટ કરવા કોશીષ કરવામાં આવી રહી છે, જે રાજકારણમાં ગળાડુબ છે એ બધા જાણે કે, ભાજપની શહેર સંગઠનની પાંખમાં પોતાની પાંખો સેટ કરવા માટે કોની-કોની વચ્ચે અંદરખાને એક પ્રકારે રેસ લાગી છે અહીં જોવાનું એ પણ છે કે શહેર સંગઠનમાં કોણ પોતાના મનગમતાને ઘુસાડવામાં સફળ થાય છે. આના પરથી જે તે નેતાની ભાવી તાકાતના પણ સંકેતો મળી જશે. ​​​​​​​