ગઈકાલે રાજકોટ નલિયા સહિત રાજ્યના અનેક સેન્ટરોમાં લઘુતમ તાપમાનનો પારો સાતથી નવ ડિગ્રી જેટલો નીચે ઉતરી ગયા બાદ આજથી ફરી વાતાવરણ ધીમે ધીમે નોર્મલ થઈ રહ્યું છે. આજે લઘુતમ તાપમાનમાં અમુક જગ્યાએ વધારો થયો છે તો અમુક જગ્યાએ ઘટાડો થયો છે. ભુજ જેવા સેન્ટરમાં આજે ગઈકાલ જેટલું જ લઘુતમ તાપમાન રહ્યું છે. હવામાન ખાતાના જણાવ્યા મુજબ આવતીકાલથી તાપમાનનો પારો ઉચે ચડતો જશે અને ફરી ઉનાળા જેવી ગરમીનો અહેસાસ લોકોને થશે.
રાજકોટમાં ગઈકાલે ૧૨.૨ ડિગ્રી લઘુતમ તાપમાન નોંધાયું હતું તેમાં આજે ઘટાડો નોંધાયો છે અને આજનું લઘુત્તમ તાપમાન આજે ૧૧.૯ ડિગ્રી નોંધાયું છે. નલિયામાં ગઈકાલે એક સાથે ૯ ડિગ્રી તાપમાન ઘટી ગયા બાદ આજે તાપમાન ઊંચકાયું છે નલિયામાં ગઈકાલે ૮.૮ અને આજે ૧૦ ડિગ્રી લઘુતમ તાપમાન રહ્યું છે. ભુજમાં ગઈકાલે અને આજે એમ બંને દિવસ એક સરખુ ૧૫.૧ ડીગ્રી લઘુતમ તાપમાન નોંધાયું છે.
​​​​​​​
ભાવનગરમાં આજે લઘુતમ તાપમાન ૧૬.૨ ડિગ્રી નોંધાયું છે જે ગઈકાલના ૧૭ ડિગ્રીની સરખામણીએ એકાદ ડિગ્રી જેટલું ઓછું છે. દ્વારકામાં સામાન્ય ફેરફાર સાથે આજે ૧૯ ડિગ્રી લઘુતમ તાપમાન નોંધાયું છે. ઓખામાં એકાદ ડિગ્રીના ઘટાડા સાથે આજે ૨૦.૬ ડિગ્રી લઘુત્તમ તાપમાન રહ્યું છે. પોરબંદરમાં ગઈકાલે ૧૫.૬ અને આજે ૧૫ ડીગ્રી લઘુતમ તાપમાન રહ્યું છે. વેરાવળમાં આજનું લઘુતમ તાપમાન ૧૭.૯ ડિગ્રી છે જે ગઈકાલના ૧૮.૫ ડિગ્રી ની સરખામણીએ એકાદ ડિગ્રી જેટલું ઓછું છે.