ગુગલ આર્ટિફિશિયલ જનરલ ઇન્ટેલિજન્સ (AGI) ની સ્પર્ધામાં પાછળ રહેવા માંગતું નથી. આ તણાવને કારણે, કંપનીના સહ-સ્થાપક સેર્ગેઈ બ્રિને તેમના કર્મચારીઓને અઠવાડિયામાં 60 કલાક કામ કરવાની અને દરરોજ ઓફિસ આવવાની સલાહ આપી છે. બ્રિને એક આંતરિક મેમોમાં કહ્યું હતું કે, ગૂગલ AI રેસ જીતી શકે છે. પરંતુ આ માટે કર્મચારીઓએ પહેલા કરતાં વધુ મહેનત કરવી પડશે.

ઇન્ફોસિસના સહ-સ્થાપક નારાયણ મૂર્તિએ 40 વર્ષ સુધી દર અઠવાડિયે 70 કલાકથી વધુ કામ કર્યું. નારાયણ મૂર્તિના નિવેદન પછી, L&Tના ચેરમેન એસએન સુબ્રમણ્યમે 90 કલાક કામ કરવાની વાત કરી. સોશિયલ મીડિયા પર આ મુદ્દા પર ઘણી ચર્ચા થઈ હતી. હવે ગૂગલે તેના કર્મચારીઓને 60 કલાક કામ કરવાની સલાહ આપી છે.

રોજ ઓફિસ આવવાની સલાહ
બ્રિને તેમના કર્મચારીઓને દરરોજ કાર્યકારી દિવસે ઓફિસમાં આવવા અને તેમનું પ્રોડક્શન વધારવા કહ્યું. તેમણે કહ્યું કે, તમારા બધા માટે 60 કલાક કામ કરવું વધુ સારું રહેશે. પરંતુ જો તમે આનાથી વધુ કરો છો તો બર્નઆઉટ થઈ શકે છે. બ્રિને કહ્યું કે, કેટલાક કર્મચારીઓ ઓછું કામ કરી રહ્યા છે, જે ટીમના બાકીના સભ્યોના મનોબળને અસર કરી શકે છે. આ ટીમ માટે ખૂબ જ ખરાબ પ્રથા છે.

ગૂગલ AI રેસમાં આગળ વધવા માંગે છે
ગૂગલે આટલો મોટો નિર્ણય લીધો છે. કારણ કે ગૂગલની AGI ડેવલોપમેન્ટ ટીમ જેમિની AI પર કામ કરી રહી છે. બ્રિનના મતે, જો કર્મચારીઓ તેમના તરફથી વધુ પ્રયત્નો કરે, તો ગૂગલ AI વિશ્વમાં નેતૃત્વ કરી શકે છે. AGIની અંતિમ દોડ શરૂ થઈ ગઈ છે. જે જીતવા માટે ગુગલ શ્રેષ્ઠ પ્રયાસ કરશે.

ટેક કંપનીઓ હાઇબ્રિડ વર્ક પોલિસીથી પાછળ હટી રહી છે
બ્રિનના નિર્ણયથી એક વાત સ્પષ્ટ થાય છે કે ટેક કંપનીઓ હાઇબ્રિડ વર્ક પોલિસીથી પીછેહઠ કરી રહી છે. તેઓ તેમના કર્મચારીઓને પૂર્ણ-સમય ઓફિસમાં પાછા લાવવાનો પ્રયાસ કરી રહ્યા છે. આ પહેલા ઘણી કંપનીઓએ તેમના કર્મચારીઓના કામના કલાકો વધારવાની નીતિ અપનાવી છે. 2022 માં ChatGPTની શરૂઆત પછી AI માટેની લડાઈ ઘણી લાંબી ચાલી છે. માઇક્રોસોફ્ટ, ઓપનએઆઈ અને મેટા જેવી કંપનીઓ પણ AGI રેસમાં પોતાનો દાવ લગાવી રહી છે.