ખાડી દેશ ઓમાનમાંથી એક અત્યંત દુઃખદ અને દર્દનાક સમાચાર સામે આવ્યા છે. ઓમાનના સુલતાન સઈદ બિન તૈમૂર સ્ટ્રીટ પર ભારતીય નાગરિકોને લઈ જઈ રહેલું એક વાહન અચાનક અકસ્માતનો ભોગ બન્યું હતું. આ ગંભીર માર્ગ અકસ્માતમાં 1 ભારતીય નાગરિકનું કરૂણ મોત નીપજ્યું છે, જ્યારે અન્ય 9 ભારતીયો ગંભીર રીતે ઘાયલ થયા છે. અકસ્માત સર્જાયા બાદ ઘટનાસ્થળે અફરાતફરીનો માહોલ સર્જાયો હતો અને સ્થાનિક તંત્ર દ્વારા તાત્કાલિક રાહત અને બચાવ કામગીરી શરૂ કરવામાં આવી હતી.

​​​​​​​સ્થાનિક પોલીસ અને તંત્ર દ્વારા આપવામાં આવેલી માહિતી અનુસાર, વાહનમાં અચાનક કોઈ યાંત્રિક ખામી સર્જાઈ હતી અથવા તો ખરાબ હવામાનના કારણે વાહન પરથી ડ્રાઈવરે કાબૂ ગુમાવી દીધો હતો. જેના પરિણામે વાહન અનિયંત્રિત થઈને રોડ પરથી નીચે ઊતરી ગયું હતું અને પલટી મારી ગયું હતું. આ અકસ્માત શનિવારે સુલતાન સઈદ બિન તૈમૂર સ્ટ્રીટ પર બન્યો હતો. રોયલ ઓમાન પોલીસે પોતાના સત્તાવાર સોશિયલ મીડિયા પ્લેટફોર્મ 'X' પર આ ઘટનાની વિગતવાર માહિતી શેર કરી છે.

રોયલ ઓમાન પોલીસના એર વિંગે આ અકસ્માતમાં ઘાયલ થયેલા લોકોને ઝડપથી સારવાર મળી રહે તે માટે એક વિશેષ એર રિસ્ક્યુ ઓપરેશન ચલાવ્યું હતું. પોલીસે અલ હેમા ગવર્નરેટથી 2 ગંભીર રીતે ઘાયલ વ્યક્તિઓને તાત્કાલિક એરલિફ્ટ કરીને નિઝવા હોસ્પિટલ પહોંચાડ્યા હતા. જ્યારે અન્ય ઘાયલોને એમ્બ્યુલન્સ મારફતે સારવાર અર્થે નિઝવા હોસ્પિટલમાં ખસેડવામાં આવ્યા છે. હોસ્પિટલમાં તબીબો દ્વારા તમામ ઈજાગ્રસ્તોની સઘન સારવાર કરવામાં આવી રહી છે.

​​​​​​​સૂત્રો અને સ્થાનિક મીડિયા અહેવાલો મુજબ, ઘટના સમયે વિસ્તારમાં ભારે વાવાઝોડું, મુસળધાર વરસાદ અને ધૂળની ડમરીઓને કારણે હાઈવે પર દ્રશ્યતા (વિઝિબિલિટી) ખૂબ જ ઓછી થઈ ગઈ હતી. સત્તાવાળાઓએ અગાઉથી જ ખરાબ હવામાન અંગે ચેતવણી પણ જારી કરી હતી. રોયલ ઓમાન પોલીસે જણાવ્યું કે વાહન રોડ પરથી ઉતરી જતાં આ દર્દનાક હોનારત સર્જાઈ હતી. ભારતીય દૂતાવાસ અને સ્થાનિક સત્તાવાળાઓ મૃતકના પરિવારજનો અને ઘાયલોના સંપર્કમાં છે તેમજ તમામ શક્ય સહાય પૂરી પાડવામાં આવી રહી છે.