પોરબંદર શહેર અને જિલ્લામાં એક થી દોઢ ઇંચ જેટલો વરસાદ વરસી ગયો છે અને હજુ મેઘાવી વાતાવરણ જોવા મળી રહ્યું છે.
સમગ્ર ગુજરાતમાં નવમી મે સુધી વરસાદની આગાહી છે,ત્યારે પોરબંદર જિલ્લામાં પણ કમોસમી વરસાદ શ‚ થયો છે અને બુધવારે બપોર બાદ પોરબંદર શહેરમાં એક ઇંચ જેટલો ધોધમાર વરસાદ વરસ્યો હતો.તો બીજી બાજુ નજીકના રાણાકંડોરણા, ભોદ મોકર અને રાણાવાવ તથા આદિત્યાણા વિસ્તારમાં તેમજ બરડા ડુંગરના બિલેશ્ર્વર સહિતના વિસ્તારમાં પણ અડધોથી એક ઇંચ વરસાદ વરસી ગયો હતો.રાણાવાવ તથા આદિત્યાણા સહિત આજુબાજુના તાલુકાના અનેક ગામડાઓમાં એક થી દોઢ ઇંચ જેટલો વરસાદ વરસ્યો છે.પોરબંદર શહેર અને આજુબાજુના વિસ્તારમાં પણ સાંજે વરસાદ એકીધારે  વરસ્યો હતો જેના કારણે શહેરના જુદા-જુદા વિસ્તારોમાં વરસાદી પાણી ભરાઈ ગયા હતા. પોરબંદર શહેરની ચોપાટી ઉપર પણ વિશાળ સંખ્યામાં લોકો વરસાદી વાતાવરણની મજા માણવા માટે ઉમટી ગયા હતા અને તીવ્ર ગરમીમાંથી વાતાવરણમાં ઠંડક પ્રસરી ગઈ હતી.