પહલગામ આતંકવાદી હુમલા બાદ પાકિસ્તાન સામે ભારત સરકાર વધુ આક્રમક વલણ અપનાવી રહી છે. જળશક્તિ મંત્રી સીઆર પાટીલે આજે એક આકરું નિવેદન આપતા જણાવ્યું હતું કે પાકિસ્તાનને સિંધુ નદીનું એક પણ ટીપું પાણી નહીં મળે. તેમણે ઉમેર્યું હતું કે સિંધુ જળ સંધિને સ્થગિત કરવાનો નિર્ણય ત્રણ તબક્કામાં લેવામાં આવશે અને આ માટે ત્રણ પ્રકારની રણનીતિ તૈયાર કરવામાં આવી રહી છે.

મંત્રી પાટીલનું આ નિવેદન ભારતના તે નિર્ણયને અનુરૂપ છે જેમાં કાશ્મીર હુમલા બાદ પાકિસ્તાન સાથેની સિંધુ જળ સંધિ પર રોક લગાવવાની વાત કરવામાં આવી છે. તેમનું આ કડક વલણ દર્શાવે છે કે ભારત હવે પાકિસ્તાન દ્વારા આતંકવાદને સમર્થન આપવાની નીતિ સામે કોઈપણ પ્રકારની નરમ વલણ દાખવવાના મૂડમાં નથી.

ત્રણ તબક્કામાં સંધિ સ્થગિત કરવાની રણનીતિ અંગે હજુ વધુ વિગતો સામે આવી નથી, પરંતુ માનવામાં આવે છે કે ભારત આ પગલું પાકિસ્તાન પર આંતરરાષ્ટ્રીય સ્તરે દબાણ વધારવા અને તેને આતંકવાદી પ્રવૃત્તિઓથી દૂર રહેવા માટે મજબૂર કરવાના ઉદ્દેશ્યથી લઈ રહ્યું છે. જળશક્તિ મંત્રીના આ નિવેદનથી બંને દેશો વચ્ચે તણાવ વધુ વધવાની સંભાવના છે.