પાકિસ્તાનના ખૈબર પખ્તુનખ્વા પ્રાંતમાં ગુપ્ત માહિતી આધારિત કાર્યવાહીમાં સુરક્ષા દળોએ પ્રતિબંધિત તહરીક-એ-તાલિબાન પાકિસ્તાન (TTP) ના 22 આતંકવાદીઓને ઠાર માર્યા છે, એમ સેનાની મીડિયા વિંગે મંગળવારે જણાવ્યું હતું. ઇન્ટર-સર્વિસિસ પબ્લિક રિલેશન્સ (ISPR) દ્વારા જારી કરાયેલા એક નિવેદનમાં કહેવામાં આવ્યું છે કે સુરક્ષા દળોએ સોમવારે ઉત્તર વઝીરિસ્તાનની સરહદે આવેલા બન્નુ જિલ્લામાં આ કાર્યવાહી શરૂ કરી હતી, જ્યાં આતંકવાદીઓની હાજરીની જાણ કરવામાં આવી હતી.

શોધખોળ કામગીરી ચાલુ 

નિવેદનમાં કહેવામાં આવ્યું છે કે, ઓપરેશન દરમિયાન, સૈનિકોએ ખાવરિજના એક ઠેકાણાને નિશાન બનાવ્યું અને ભીષણ એન્કાઉન્ટર પછી, 22 ખાવરિજ માર્યા ગયા. પાકિસ્તાન સરકાર TTP આતંકવાદીઓનો ઉલ્લેખ કરવા માટે "ફિત્ના અલ-ખાવરિજ" શબ્દનો ઉપયોગ કરે છે. ISPRએ જણાવ્યું હતું કે વિસ્તારમાં તમામ આતંકવાદીઓનો નાશ કરવા માટે શોધખોળ કામગીરી ચાલુ છે.

વડાપ્રધાન શાહબાઝ શરીફે શું કહ્યું?

વડાપ્રધાન શાહબાઝ શરીફે સફળ કાર્યવાહી માટે સુરક્ષા દળોની પ્રશંસા કરી અને કહ્યું કે તેઓ આતંકવાદ સામેની લડાઈમાં મોટી સફળતાઓ મેળવી રહ્યા છે. તેમણે કહ્યું, આખો રાષ્ટ્ર આતંકવાદ સામેના યુદ્ધમાં પાકિસ્તાન સેનાની સાથે ઉભો છે. અમે દેશમાંથી તમામ પ્રકારના આતંકવાદને સંપૂર્ણપણે નાબૂદ કરવા માટે પ્રતિબદ્ધ છીએ.

પાકિસ્તાની સેના પર હુમલો

આ દરમિયાન, એ પણ નોંધવું જોઈએ કે તાજેતરમાં, ખૈબર પખ્તુનખ્વા પ્રાંતમાં પાકિસ્તાની સેના પર હુમલો થયો હતો. આ હુમલામાં સુરક્ષા દળોના કાફલાને નિશાન બનાવવામાં આવ્યો હતો. IED વિસ્ફોટથી કરવામાં આવેલા આ હુમલામાં એક કેપ્ટન સહિત ઓછામાં ઓછા છ પાકિસ્તાની સૈનિકો માર્યા ગયા હતા. લશ્કરની મીડિયા શાખા, ઇન્ટર-સર્વિસિસ પબ્લિક રિલેશન્સ (ISPR) એ આ હુમલાની જાણ કરી છે. પાકિસ્તાની સેનાના કાફલા પર હુમલો અફઘાનિસ્તાનની સરહદે આવેલા અશાંત કુર્રમ આદિવાસી જિલ્લાના સુલતાની વિસ્તારમાં થયો હતો.