ઓસ્ટ્રેલિયાના ઉદાહરણને અનુસરીને ગોવા પણ 16 વર્ષથી ઓછી ઉંમરના બાળકો માટે સોશિયલ મીડિયા પર પ્રતિબંધ મૂકી શકે છે જે માટે સરકાર ખાસ નીતિ તૈયાર કરી રહી છે. ગોવાના માહિતી ટેકનોલોજી મંત્રી રોહન ખાઉંટેએ જણાવ્યું હતું કે તેમની સરકાર રાજ્યમાં 16 વર્ષથી ઓછી ઉંમરના બાળકો માટે ઇન્ટરનેટ મીડિયાના ઉપયોગ પર પ્રતિબંધ મૂકવાની શક્યતા પર વિચાર કરી રહી છે.તેમણે ડિજિટલ વ્યસન, સાયબર ધમકી અને ઓનલાઈન સલામતીના જોખમો અંગે વધતી ચિંતાઓનો ઉલ્લેખ કર્યો.

તેમણે કહ્યું કે રાજ્ય શિક્ષણવિદો, વાલી-શિક્ષક સંગઠનો, ઉદ્યોગ અને સરકારના પ્રતિનિધિઓનો સમાવેશ કરીને એક કાર્યકારી સમિતિ બનાવવાની યોજના ધરાવે છે જે આ મુદ્દાનો અભ્યાસ કરશે અને નીતિ માળખું સૂચવશે.

16 વર્ષથી ઓછી ઉંમરના બાળકો માટે ઓસ્ટ્રેલિયા દ્વારા ઇન્ટરનેટ મીડિયા પર પ્રતિબંધ જેવા વૈશ્વિક ઉદાહરણોનો ઉલ્લેખ કરતા, ખાઉંટેએ કહ્યું કે ભારતમાં આ મુદ્દા પર ગંભીર વિચારણાની જરૂર છે અને તેને વ્યવસ્થિત અને સલાહકારી રીતે સંબોધિત કરવી જોઈએ.

તેમણે કહ્યું કે 16 વર્ષની ઉંમર ખૂબ જ સંવેદનશીલ ઉંમર છે. જ્યારે બાળકોએ શિક્ષણ અને સર્વાંગી વિકાસ પર ધ્યાન કેન્દ્રિત કરવું જોઈએ, ત્યારે ડિજિટલ વ્યસન, વય-અનુચિત સામગ્રીના સંપર્કમાં આવવાના કિસ્સાઓ, ચિંતા, હતાશા અને વ્યક્તિગત ડેટાના દુરુપયોગના વધતા જતા કિસ્સાઓએ ખતરાની ઘંટડી વગાડી છે.

ઉતાવળમાં નિર્ણયો નહી લેવાય તેવી ખાતરી

મંત્રીએ એમ પણ કહ્યું કે કોઈપણ નિર્ણય કેન્દ્રીય કાયદાઓ અનુસાર હોવો જોઈએ, જેમાં માહિતી ટેકનોલોજી કાયદાની જોગવાઈઓ શામેલ છે. અમારો ઉદ્દેશ્ય ઉતાવળમાં નિર્ણયો લેવાનો નથી, પરંતુ 16 વર્ષથી ઓછી ઉંમરના બાળકોને ઇન્ટરનેટ મીડિયાના જોખમોથી કેવી રીતે સુરક્ષિત રાખી શકાય તેની તપાસ કરવાનો છે, સાથે સાથે ડિજિટલ ઉપકરણોના સર્જનાત્મક અને શૈક્ષણિક ઉપયોગને પણ પ્રોત્સાહન આપવાનો છે.