સ્ટેટ ઇમરજન્સી ઓપરેશન સેન્ટર, ગાંધીનગર દ્વારા જારી કરવામાં આવેલા તાજેતરના આંકડા મુજબ, તારીખ ૧૫ સપ્ટેમ્બર ૨૦૨૬ના રોજ સવારે ૦૬:૦૦ વાગ્યાથી બપોરે ૧૪:૦૦ વાગ્યા સુધીના આઠ કલાક દરમિયાન ગુજરાતના વિવિધ જિલ્લાઓમાં વરસાદી માહોલ જોવા મળ્યો છે. રાજ્યના અનેક તાલુકાઓમાં હળવાથી લઈને ધોધમાર વરસાદ નોંધાયો છે, જેના કારણે વાતાવરણમાં ઠંડક પ્રસરી ગઈ છે.  

કચ્છ જિલ્લામાં મેઘરાજાની મહેર: માંડવીમાં સૌથી વધુ વરસાદ

આજના આ સમયગાળા દરમિયાન કચ્છ જિલ્લામાં સૌથી વધુ વરસાદ ખાબક્યો હોવાનું સામે આવ્યું છે. કચ્છના માંડવી તાલુકામાં સવારે ૦૬:૦૦ થી બપોરે ૧૪:૦૦ વાગ્યા દરમિયાન સૌથી વધુ ૧૭૭ મિમી (અંદાજે ૬.૯૭ ઇંચ) જેટલો ભારે વરસાદ નોંધાયો છે. આ ઉપરાંત કચ્છના જ અબડાસા તાલુકામાં ૫૩ મિમી (૨.૦૯ ઇંચ) અને મુંદ્રા તાલુકામાં ૪૦ મિમી (૧.૫૭ ઇંચ) વરસાદ વરસ્યો છે. નખત્રાણામાં ૩૩ મિમી અને ભુજમાં ૩૨ મિમી વરસાદ નોંધાયો હોવાના આંકડા સામે આવ્યા છે.  

માંડવી શહેરના નીચાણવાળા વિસ્તારો ચારે બાજુથી પાણીથી ઘરેયા છે. સલાયા, નવાપરા, આઝાદ ચોક સહિતના વિસ્તારોમાં ભારે પાણીનો ભરાવો થયો છે. નદીની જેમ પાણી વહી રહ્યાં છે. તેમજ મંદિરમાં વરસાદી પાણી ઘૂસી ગયાના દૃશ્યો સામે આવ્યા છે. સોસાયટીમાં પાર્ક કરેલી કેટલીક કાર પણ ડૂબી ગઈ છે.

દેવભૂમિ દ્વારકા અને અન્ય જિલ્લાઓની સ્થિતિ

કચ્છ ઉપરાંત દેવભૂમિ દ્વારકા જિલ્લામાં પણ મેઘરાજાએ પોતાની હાજરી નોંધાવી છે. દ્વારકાના ખંભાળિયા તાલુકામાં ૨૨ મિમી (૦.૮૭ ઇંચ) અને ઓખામંડળમાં ૧૮ મિમી (૦.૭૧ ઇંચ) વરસાદ પડ્યો છે. આ સાથે ખેડાના નડિયાદમાં ૧૪ મિમી, સુરત સિટીમાં ૧૪ મિમી અને ભાવનગરના સિહોરમાં ૧૨ મિમી વરસાદ નોંધાયો હોવાનું સત્તાવાર અહેવાલમાં જણાવાયું છે.  

હળવા વરસાદી ઝાપટાં અને છૂટોછવાયો માહોલ

રાજ્યના અન્ય વિસ્તારો જેવા કે પોરબંદર, જામનગર, આણંદ, સુરત, ગીર સોમનાથ, ભરૂચ, જૂનાગઢ, ભાવનગર, બનાસકાંઠા, પાટણ, પંચમહાલ, મહીસાગર, અરવલ્લી, મહેસાણા, વડોદરા, અમરેલી અને વલસાડ જિલ્લાના વિવિધ તાલુકાઓમાં ૧ મિમીથી લઈને ૯ મિમી સુધીનો હળવો વરસાદ કે છૂટાછવાયા ઝાપટાં નોંધાયા છે. મોટાભાગના સ્થેરોએ સવારના સત્રમાં વરસાદનું જોર વધુ જોવા મળ્યું હતું, જે બાદ બપોરે પરિસ્થિતિ સામાન્ય થઈ હતી.