રાજકોટ-અમદાવાદ હાઈવે પર આવેલ રામપર બૅટી ગામના પાટિયા નજીક મોડી રાત્રિના સમયે વાહનચાલકોની બેદરકારી અને ઓવરસ્પીડના કારણે એક ભીષણ ત્રિપલ અકસ્માત સર્જાયો હતો. હાઈવે પરથી પસાર થઈ રહેલા ત્રણ વાહનો એકબીજા સાથે ધડાકાભેર અથડાતાં મોટો અકસ્માત સર્જાયો હતો. 

આ પ્રચંડ અકસ્માત એટલો ભયાનક હતો કે વાહનોના ફુરચેફુરચા ઉડી ગયા હતા અને તેમાં સવાર બે મહિલાઓના ઘટનાસ્થળે જ કમકમાટીભર્યા મોત નીપજ્યા હતા. અકસ્માતને પગલે હાઈવે પર લાંબો ટ્રાફિક જામ સર્જાયો હતો અને મુસાફરોમાં ભારે ફફડાટ વ્યાપી ગયો હતો.

108 એમ્બ્યુલન્સ મારફતે ઈજાગ્રસ્તો રાજકોટ સિવિલ ખસેડાયા
અકસ્માતનો અવાજ એટલો તીવ્ર હતો કે આસપાસની હોટેલ અને વાડી વિસ્તારમાંથી લોકો તાત્કાલિક હાઈવે પર દોડી આવ્યા હતા.